АҚШ Зеленскийни "ўйиндан чиқаряпти": Украинада жиддий ўзгариш бошландими?

Украинанинг собиқ бош вазири Николай Азаров АҚШ томонидан президент Владимир Зеленскийни ҳокимиятдан четлатишга оид махфий режалар бошланганини маълум қилди. Собиқ вазирнинг фикрича, Вашингтон Зеленскийга ишончини бутунлай йўқотган ва уни сиёсий саҳнадан четлаштириш ишларига аллақачон киришиб кетган.

Азаров ўз баёнотида бир неча кун аввал Украинада содир бўлган шов-шувли воқеага – Зеленскийнинг яқин дўсти ва ишончли ҳамкори сифатида танилган Леонид Миндичнинг ҳибсга олинишига эътибор қаратди.

Миндич Зеленскийнинг президентлик аппарати раҳбари Андрей Ермак билан ҳам яқин алоқада бўлган ва Украина президентининг молиявий ишларини бошқарган “ҳамён” сифатида кўрилади. Николай Азаров бу ҳибсга олиш операциясини АҚШнинг Украинадаги таъсири остида бўлган Миллий коррупцияга қарши бюроси ва Ихтисослаштирилган коррупцияга қарши прокуратура амалга оширганини таъкидлади.

"Бу ташкилотларни америкаликлар яратиб, тўлиқ ўз одамлари билан таъминлаган. Улар фақат АҚШга бўйсунадиган махсус тузилмалардир. Демак, Миндични қўлга олиш бевосита Вашингтоннинг буйруғи асосида содир бўлган," — деди Азаров ўз сўзида.

Шунингдек, АҚШ Украинага йўналтирган маблағларнинг сарфланишини назорат қилиш мақсадида Киевга қарийб 100 нафар америкалик аудитори келгани ҳам собиқ бош вазирнинг фикрини тасдиқлайдиган яна бир омилдир.

"Бу жиддий белги. Чунки энди Киевда сиёсатчилар эмас, АҚШ бюджетини назорат қилувчи малакали аудиторлар пайдо бўлди. Бу каби жараёнлар Оқ уйнинг шахсан кўрсатмаси билан бўлмоқда. Демак, Зеленскийга қарши жиддий кураш бошлангани яққол кўриниб турибди," – дея қўшимча қилди Николай Азаров.

Унинг фикрича, бу жараён тез орада босқичма-босқич давом этади ва Зеленский ўз лавозимидан ёки ихтиёрий равишда кетади ёки уни мажбурий равишда "кетказишади".

"Зеленскийнинг кетиши энди вақт масаласи. Уни мулклари ва пуллари билан қўрқитиб, эркинлигидан ҳам маҳрум этишлари мумкинлигига ишонтиришади," – дейди Азаров ўзининг тахминий сценарийсини баён қилиб.

Эслатиб ўтамиз, 3 июнь куни Украина президентининг яқин шериги, Зеленский билан бирга "Квартал 95" студиясини ташкил этган Леонид Миндич Руминия чегарасини ноқонуний кесиб ўтишга уринаётган пайтида қўлга олинганди. Украинанинг бир қатор ОАВлари Миндичнинг Зеленский билан алоқалари ҳануз сақланиб қолгани, у Ермакнинг асосий маслаҳатчиларидан бири сифатида фаолият юритганини таъкидлашган эди.

Бу воқеалар Украинада сиёсий манзара жиддий ўзгариш арафасида эканидан далолат бериши мумкин. Америка маъмурияти бу каби кескин қарорлар билан Зеленскийдан бутунлай воз кечганини кўрсатмоқдами? Бу савол яқин вақт ичида аниқ жавоб топади.

Фото: Коммерсант