Трамп Украина ва Россияни «бироз уруштириб қўйиш»ни таклиф қилди!

Оқ уйда Германия канцлери Фридрих Мерц билан учрашувда АҚШ президенти Доналд Трамп Украина ва Россия ўртасидаги можаро ҳақида кутилмаган баёнот берди. Унинг сўзларига кўра, айни дамда музокаралар давом эттиришдан аввал, икки томонни «бироз уруштириб қўйиш» керак бўлиши мумкин. Трамп бу икки давлатни паркда ўзаро муштлашаётган болаларга ўхшатиб, баъзида уларни ажратишдан олдин ўз-ўзидан «совуб қолишлари» учун имкон бериш лозимлигини айтди.

Доналд Трамп ушбу оригинал таққослашни Россия президенти Владимир Путин билан яқинда ўтказган телефон мулоқотида ҳам қўллаганини билдирди. Урушни якунлаш жуда мураккаб эканига ишора қилган Трамп буни икки давлат раҳбарлари – Путин ва Зеленский ўртасида нафрат ва икки халқ ўртасида жуда кучли адоват борлиги билан боғлади.

«Ўйлаб кўринг, икки ёш бола паркда қаттиқ жанжаллашиб кетса, уларни бирдан ажратиб қўйиш жуда қийин бўлади. Айрим ҳолатларда бу жанжал уларнинг ҳиссиётлари совиши учун озгина давом этиши керак. Кейинроқ ажратиб қўйсангиз, самаралироқ бўлади», — деди Трамп Германия раҳбари билан мулоқотда.

Аввалроқ, Доналд Трамп президентлик лавозимига қайтгач, илк 24 соат ичида Украинадаги можарони ҳал қилишни ваъда қилганди. Бироқ кейинроқ ушбу жараёнга яна ярим йил зарурлигини билдирган ва агар шу вақт ичида жиддий натижага эришилмаса, тинчлик музокараларини бутунлай тўхтатиш билан таҳдид қилганди.

Шу кунги учрашувда Трамп музокараларнинг мураккаблиги яна бир бор тасдиқланганини таъкидлади. Россияга қарши санкциялар қўллаш эҳтимоли ҳақида сўралганида, у бу саволга аниқ жавоб беришдан қочиб, «агар битим тузилмаса, санкциялар давом этади» дея, дедлайн унинг «миясида» эканини таъкидлади.

Шунингдек, Трамп Путин билан яқинда ўтказилган сўнгги телефон суҳбати ҳақида ҳам маълумот берди. У мулоқот давомида Путинга Украинанинг Россиядаги ҳарбий аэродромларга зарба беришини жавобсиз қолдиришни сўраганини айтди. Бироқ Россия раҳбари жавоб қайтармаслик иложсизлигини билдирди, деди Трамп.

«Мен Путинга "бу ишни қилмасангиз яхши бўлади, бу вазиятни тўхтатишингиз керак" дедим. Лекин у ҳам менга "бунга жавоб қайтаришдан бошқа чора йўқ" деб очиқ айтди», — деди Трамп журналистларга берган баёнотида.

Оқ уй раҳбари Путин билан ўтказилган бир соату 15 дақиқалик телефон суҳбатини яхши, лекин зудлик билан тинчликка олиб келмайдиган мулоқот сифатида баҳолади.

Айтиш керакки, Трамп ўзининг аввалги президентлик муддатида «Шимолий оқим-2» газ қувурига қарши кескин санкциялар жорий этган эди ва агар у 2022 йилда ҳам президент бўлганида, бу можаро бошланмаган бўлишини такрорлади. Шунингдек, у яна бир бор ўзидан олдинги президент Жо Байденни Украинадаги вазиятнинг ёмонлашувида айблаб танқид қилди.

Мулоқот давомида Германия канцлери Фридрих Мерц эса АҚШ раҳбарини Россияга босимни янада оширишга чақириб, бу можарога нуқта қўйишда унинг муҳим ролини алоҳида таъкидлади.

«Биз Украина томонида эканимизни ва Россияга қарши босимни кучайтириш зарурлигини қайта-қайта айтмоқдамиз. Доналд Трамп эса бунга жуда яхши имкониятга эга бўлган шахс», — деди Мерц ўз нутқида.

Кўплаб экспертлар ва ОАВ учрашув арафасида Германия канцлери учун учрашув давомида Трамп томонидан ғалати ва ноқулай вазиятга солиниши эҳтимолини тахмин қилганди. Сабаби, Трамп аввалроқ бир неча марта хорижий етакчилар билан учрашувларда турли ноқулай шароитларни яратиб, уларни ҳайратга солган эди. Лекин бу гал канцлер билан учрашув кутилганидан ҳам дўстона тарзда ўтди.

Германия раҳбари Трамп билан учрашувдан аввалги нутқида икки давлат ўртасидаги дўстона муносабатларни қайта-қайта таъкидлади. У икки мамлакат ўртасидаги иттифоқ Европа эркинлиги ва хавфсизлиги учун энг муҳим омил эканини қайд этди.

Шунингдек, Мерц учрашув давомида Трампга узоқ нутқ сўзламасликка қарор қилганини маълум қилди. Унинг фикрича, Оқ уй раҳбарига кўпроқ гапиришга имкон бериш керак, чунки бу билан унинг реал позициясини яхшироқ англаш мумкин.

Трамп ва Мерц ўртасидаги учрашув ўзаро илиқ руҳда кечди. Трамп Германияни мудофаа харажатларини ошириш бўйича режаларини қўллаб-қувватлади. Германия канцлери эса ўз навбатида, икки мамлакат ўртасидаги ўзаро ишонч ва ҳамкорлик учун миннатдорчилик билдирди.

Экспертлар бу учрашувнинг асосий мавзуси сифатида Украина ва Россия ўртасидаги можаро муҳокама қилинганини, икки етакчининг музокараси эса янги стратегияларни белгилашда муҳим босқич бўлиши мумкинлигини таъкидламоқда.

Шундай қилиб, Трампнинг «бироз уруштириб қўйиш» ҳақидаги фикри халқаро миқёсда янги баҳсларни келтириб чиқарди ва экспертларнинг диққат марказига тушди. Бугунги кунда бутун дунё мазкур музокаранинг келажаги ҳақида қизғин муҳокамалар олиб бормоқда.