Алп тоғлари бағрида яшаш учун пул берадиган қишлоқ!

Швейцариянинг Алп тоғлари этакларида жойлашган кичик ва жуда гўзал Албинен қишлоғи ўз аҳолисини кўпайтириш учун ажойиб дастур эълон қилди. Ушбу қишлоққа кўчиб келувчиларга катта миқдорда молиявий ёрдам таклиф этилмоқда, деб хабар тарқатди Daily Mail нашри.

Маълум қилинишича, бу ерга кўчиб келган ҳар бир янги аҳолига 20 минг Швейцария франки (тахминан 24 минг АҚШ доллари) тақдим этилади. Бундан ташқари, оилаларга ҳар бир фарзанди учун қўшимча 10 минг франк миқдорида бонус ҳам берилмоқда. Шу тариқа, икки фарзандли оила бу жойга кўчиб ўтганда умумий 40 минг франкни ўзлаштириши мумкин.

Албинен аҳолисининг бу ташаббуси қишлоқдаги одамлар сонининг тез суръатларда камайиб бораётганига қарши курашиш мақсадида амалга оширилмоқда. Шу сабабли маҳаллий ҳокимият шу йўл билан янги аҳолини жалб қилиш ва ҳудудни янада жонлантиришни режалаштирмоқда.

Аммо Албиненда яшаш имкониятига эга бўлиш учун бир неча жиддий шартлар қўйилган. Биринчи навбатда, бу ерга кўчиб келувчи инсон ёки оила қишлоқдан энг камида 200 минг Швейцария франкига тенг қийматда уй сотиб олиши шарт. Шу билан бирга, уйнинг доимий яшаш учун мўлжалланган бўлиши талаб этилади, яъни бу кўчиб келувчилар фақат ёзги таътил учун эмас, балки йил бўйи ушбу манзилда истиқомат қилиши лозим.

Дастурдан фойдаланмоқчи бўлганларнинг ёши ҳам чекланган. Улар 45 ёшдан катта бўлмасликлари шарт. Қўйилган бу талабнинг асосий сабаби эса ёш оилалар ва ишчи кучи бўлган аҳолини жалб қилишдир.

Энг асосий шартлардан яна бири шундаки, кўчиб келувчилар Албинен қишлоғида камида 10 йил давомида доимий яшаш мажбуриятини ўз зиммаларига олади. Шу муддат давомида улар Швейцария жамияти билан тўлиқ интеграциялашиб, кейинчалик мамлакат фуқаролигини ҳам олишлари керак бўлади.

Албинен ўзининг бетакрор табиати, соф ҳавоси ва жимжит муҳити билан жуда кўп сайёҳларни ўзига жалб қилади. Бироқ сўнгги йилларда аҳоли сонининг қисқариши оқибатида қишлоқда турмуш тарзи бироз пасайган. Шу сабабли маҳаллий ҳокимият мазкур муаммони ҳал қилиш учун юқоридаги молиявий имтиёзлардан фойдаланишни лозим кўрган.

Маҳаллий аҳоли вакиллари бу ташаббус орқали қишлоқда янги ҳаёт бошланишига, кўчиб келган ёш оилалар эса Алп тоғлари бағридаги тинч ва фаровон ҳаётдан баҳраманд бўлишлари мумкинлигига ишонч билдирмоқда.

Албинен қишлоғининг мазкур таклифи дунёнинг турли бурчакларидан кўплаб одамларнинг диққатини тортмоқда. Кўриниб турибдики, ёқимли Алп табиати қўйнида яшаш истагида бўлганлар учун бу ноёб имконият ҳисобланади. Агар сиз ҳам табиат бағрида тинч ва соғлом ҳаёт кечиришни орзу қилсангиз, Албинен қишлоғи сизни кутиб қолади! «Замин»ни Telegram’да ўқинг!