Трампдан Эронга охирги огоҳлантириш: “Таслим бўлмасанг, зарба берамиз”

Яқин Шарқда кескинлик юқори даражага чиқмоқда. АҚШ собиқ президенти, аммо 2024 йилги сайловларда етакчи номзодлардан бири бўлган Доналд Трамп Эрон билан боғлиқ баёнотлари билан халқаро эътиборни яна марказга чиқарди. У Теҳронга нисбатан қатъий ултиматум эълон қилиб, ҳарбий куч ишлатиш имконини очиқ қолдирди.

Трамп ўз чиқишида Эронни “ҳаво ҳужумига қарши ҳимоясиз қолди” дея баҳолаб, мамлакат осмони тўлиқ АҚШ назорати остида эканини маълум қилди. Унга кўра, бу ҳолат Теҳронни “шартсиз таслим бўлишга” ундаш учун етарли асосдир.

Унинг сўзларига кўра, АҚШ Теҳронни ядро амбицияларидан воз кечишга мажбур қилишда қатъий қарор қилган. “Биз ҳали ғалаба қозондик деб айта олмаймиз, аммо аниқ ютуқлар бор. Яқин кунларда — эҳтимол, келаси ҳафтагача — катта воқеалар бўлиши мумкин”, — деди Трамп.

Шунингдек, у Россия президенти Владимир Путиннинг Яқин Шарқ бўйича воситачилик таклифига ҳам тўхталиб ўтди. “Бу таклифни ҳозирча орқага сурдим”, — дея билдирган Трамп, музокаралар эшиклари ҳануз ёпилмаганини, бироқ Эрон реал йўл танлашга мажбур бўлишини таъкидлади.

Аналитиклар фикрига кўра, Трампнинг бу баёнотлари минтақадаги кескинликни янада кучайтиради. Айниқса, АҚШ ва Эрон ўртасидаги ҳар қандай тўқнашув Яқин Шарқдаги геосиёсий мувозанатни издан чиқариши мумкин.

Эслатиб ўтамиз, сўнгги ҳафталарда Исроил ва Эрон ўртасидаги можаро кучайиб, минглаб ракеталар алмашинуви содир бўлган эди. Эндиликда бу жараёнга АҚШнинг ҳам фаол аралашуви эҳтимоли халқаро сиёсатнинг асосий кун тартибига айланган. «Замин»ни Telegram’да ўқинг!