Россия узоқ муддатли урушга тайёрланмоқда

Реутерснинг хабар бериши кўра, Россия Сибирнинг чекка ҳудудида жойлашган ҳарбий-саноат заводида юқори қувватли портловчи модда ишлаб чиқаришга мўлжалланган янги ишлаб чиқариш линиясини барпо этмоқда. Бу иншоот Россиянинг Украинадаги ҳарбий салоҳиятини сезиларли даражада ошириши мумкин.

Завод Россиянинг давлат мудофаа компанияси — Свердлов заводига қарашли Бийск Олеум заводида (БОЗ) жойлашган бўлиб, янги линияда ҳар йили 6,000 тоннагача РДХ ёки эҳтимол ҲМХ портловчи моддалари ишлаб чиқарилиши режалаштирилган. Бу миқдор 1,28 миллион дона ОФ-29 типидаги 152 мм калибрли артиллерия снарядларига эквивалент бўлиши мумкин.

РДХ, бу ерда ишлаб чиқарилиши кутилаётган асосий портловчи модда, артиллерия снарядлари, ракеталар, миномёт миналари ва авиабомбаларда кенг қўлланилади.

Юқори кучга эга бўлган РДХ, ТНТъдан кучлироқ ва ҲМХъдан барқарорроқ ҳисобланади, бу эса уни ҳарбий қўлланма учун идеал қилади. Мутахассисларнинг айтишича, айни вақтда Россия томонидан ишлаб чиқарилаётган снарядлар ҳажмини инобатга олсак, янги завод Россия армиясининг суръатини ушлаб қолишда муҳим рол ўйнаши мумкин.

Завод жойлашган ҳудуд Украина дронларининг амалдаги учиш доирасидан ташқарида жойлашган. Бу уни Дзержинскдаги эски ишлаб чиқариш объекти каби ҳужум хавфидан нисбатан ҳимояланган қилади. Дзержинскдаги завод аллақачон Украина дрон ҳужумларига учраган эди.

Давлат харид тизимида пайдо бўлган, сўнгра олиб ташланган ҳужжатларга кўра, лойиҳа учун 15,5 миллиард рубл (тахминан 189 миллион АҚШ доллари) ажратилган бўлиб, қурилиш ишлари 2023-йилда бошланган ва 2025-йил охиригача якунланиши режалаштирилган. Қурилиш ишларининг айрим босқичлари 2024-йил ёзида якунланган, бу эса заводнинг ишга туширилиши 6–10 ҳафта ичида амалга оширилиши мумкинлигини кўрсатади.

Россия Украинадаги урушда артиллерияга таянган ҳолда жанговар устунликка эришмоқда. Маҳаллий ишлаб чиқариш ҳажмининг оширилиши, айниқса юқори сифатли портловчи моддаларнинг етказиб берилиши, Россиянинг узоқ муддатли уруш олиб бориш имкониятларини мустаҳкамламоқда. Бу орада Ғарб давлатлари, хусусан АҚШ ва Европа, Украинани қўллаб-қувватлаш учун ҳарбий ишлаб чиқаришни оширишга ҳаракат қилмоқда, бироқ глобал портловчи модда танқислиги бу жараённи секинлаштирмоқда.

Экспертлар фикрига кўра, БОЗ заводининг кенгайтирилиши — Россиянинг урушга узоқ муддатли стратегик тайёргарлик кўраётганидан дарак беради. Бу эса Украина ва унинг иттифоқчилари учун огоҳлик ва давомли ҳарбий ва саноат салоҳиятини мустаҳкамлаш зарурлигини таъкидлайди. «Замин»ни Telegram’да ўқинг!