БРИKС давлатлари сунъий интеллект бўйича талаб қўймоқда

BRICS давлатлари — Бразилия, Россия, Ҳиндистон, Хитой ва Жанубий Африка — сунъий интеллект (СИ) технологияларининг жадал ривожланишини ҳисобга олиб, ушбу йўналишда ахборот хавфсизлиги ва интеллектуал мулк ҳуқуқларини ҳимоя қилиш зарурлигини таъкидлади. Рио-де-Жанейрода бўлиб ўтаётган икки кунлик саммит доирасида етакчилар томонидан кўриб чиқилаётган баёнот лойиҳасида, СИ тизимлари орқали рухсатсиз маълумот йиғишнинг олдини олиш ва муаллифлик ҳуқуқлари учун адолатли тўлов механизмларини жорий этиш чақириғи илгари сурилган.

Саммитда қатнашаётган етакчилар, асосан ривожланган давлатларда жойлашган йирик технологик компаниялар томонидан СИ модел машғулотларида муаллифлик ҳуқуқлари билан ҳимояланган контентдан фойдаланишга қарши қатъий позицияни билдирган. Улар адолатли рақамли иқтисодиётни шакллантиришда ривожланаётган мамлакатларнинг манфаатлари инобатга олиниши лозимлигини таъкидлашмоқда.

Баёнот лойиҳасида қайд этилишича, BRICS давлатлари СИ технологияларидан фойдаланишда "инсон ҳуқуқларини ҳурмат қилиш, шаффофлик ва масъулиятлилик" тамойилларига амал қилинишини қўллаб-қувватлайди. Шунингдек, улар халқаро ҳамжамиятни глобал СИ бошқаруви ва норматив базасини шакллантиришда фаол иштирок этишга чақирмоқда.

Бразилия ҳарбий кучлари томонидан саммит хавфсизлигини таъминлаш мақсадида ўтказилган машғулотлар фонида, мазкур форум халқаро сиёсий ва технологик кун тартибининг долзарб масалаларидан бирини муҳокама қилмоқда.

BRICS давлатлари томонидан кўтарилган бу ташаббус сунъий интеллект воситаларидан фойдаланганда ахборотга эгалик ҳуқуқи, шахсий ҳаётни ҳимоя қилиш ва адолатли компенсация каби фундаментал масалаларга халқаро эътиборни кучайтиришга қаратилган муҳим қадам бўлиши мумкин. «Замин»ни Telegram’да ўқинг!