Қозоғистоннинг Оқмўла вилоятидаги Отбосар туманида санитар-эпидемиологик вазият кескинлашди, деб хабар берди tengrinews.kz. Июн ойи охирида мазкур ҳудудда куйдирги касаллиги аниқланиб, аввалига тўрт нафар одам инфекция билан касаллангани маълум бўлди. Уларга зарур тиббий ёрдам кўрсатилиб, аҳволлари ўртача оғир деб баҳоланди. Шу пайтга қадар вазирлик карантин жорий этилмаслигини маълум қилган бўлса-да, 8 июл куни Отбосарда расман карантин чоралари амалга оширилди.
Қишлоқ хўжалиги вазири Айдарбек Сапаровга кўра, карантин аввало куйдирги аниқланган икки қишлоқда жорий этилган. Бу ҳудудларга чорва ва аҳоли кириши қатъиян тақиқланди, махсус тўсиқлар ўрнатилди ва эпидемияга қарши отряд дезинфекция ишларини бошлади. Илк маълумотларда 19 нафар фуқарода инфекция аниқлангани қайд этилган, бир бемор оғир аҳволда. Бироқ кейинроқ вазирлик бу маълумотга аниқлик киритди: 19 кишидан намуналар олинган, улардан етти нафарида куйдирги тасдиқланиб, қолганларида манфий натижа қайд этилган.
Вазирликнинг маълум қилишича, карантин чоралари 15 кун давом этади. Бу вақт ичида ҳудудда барча эпидемияга қарши чоралар кўрилади, синов учун янги намуналар олинади. Агар инфекция тарқалмагани аниқланса, карантин бекор қилинади.
Куйдирги — Bacillus anthracis бактерияси орқали юқадиган хавфли юқумли касаллик бўлиб, асосан тупроқда яшайдиган бактериалар ҳайвонлар орқали одамга ўтади. Одамлар учун инфекция асосан зарарланган ҳайвон ёки уларнинг маҳсулотлари билан алоқада бўлиш, яхши пиширилмаган гўшт истеъмол қилиш орқали тери, ошқозон-ичак ёки ўпка шаклида пайдо бўлиши мумкин. Муҳим жиҳати — касаллик одамдан одамга юқмайди.
Мутасаддилар аҳолини эҳтиёткорликка, гўшт маҳсулотларини фақат ветеринария назоратидан ўтган дўкон ва бозорлардан харид қилишга чақирмоқда. Мазкур ҳолатда қатъий профилактика ва тўғри ташкилий чоралар орқали касаллик тарқалишининг олдини олиш мумкин.
Фото: informburo.kz «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
