Америкада фуқаролик ҳуқуқлари борасида янги тортишув авж олмоқда — Ню-Хемпшир федерал суди АҚШ президенти Доналд Трампнинг мамлакатда туғилганларга автоматик фуқаролик беришни чекловчи ижроия фармойишини блоклади. Бу қарор Америка Фуқаролик Эркинликлари Уюшмаси томонидан берилган даъво асосида қабул қилинди ва фармойишни ноқонуний деб баҳолади.
Мазкур фармойишга кўра, агар АҚШда туғилган боланинг онаси мамлакатга вақтинчалик келган бўлса ва отаси бола туғилган пайтда Америка фуқароси ёки доимий резидент бўлмаса, унда болага автоматик фуқаролик берилиши рад этилади. “Америка фуқаролигининг маъноси ва қадр-қимматини ҳимоя қилиш” деб аталган бу ҳужжат 2025 йил 20 январь куни президент Трамп томонидан имзоланган эди. Бу тарихий фармойиш Америкада туғилган кўплаб болаларнинг фуқаролик мақомини қайта кўриб чиқишга олиб келиши кутилганди.
Қайд этиш жоиз, 29 июнь куни АҚШ Олий суди федерал судлар бундай фармойиш ижросини бутун мамлакат бўйлаб тўлиқ тўхтатиб қўйиш ваколатига эга эмаслиги ҳақида қарор қабул қилди. Шу билан бирга, айрим штатлар ҳудудида суд блокировкалари амал қилиши мумкинлиги, аммо умуммиллий миқёсда қарор кучга кирмаслиги таъкидланди.
Ҳуқуқшунослар ва жамоатчиликда ушбу масала бўйича жиддий баҳслар давом этмоқда. Айримлар бу фармойишни АҚШ Конституциясига зид, деб баҳоламоқда, бошқалар эса Америка фуқаролигининг қадр-қимматини сақлаш учун муҳим қадам, деб ҳисобламоқда.
Қандай бўлмасин, Трампнинг бу фармойиши ва унинг судда блокланиши АҚШда фуқаролик ҳақидаги тушунчалар, қонунчилик ва инсон ҳуқуқлари масаласида янги даврни бошлаб бериши мумкин. Вақт кўрсатади: Америкада туғилганлик ва фуқаролик ҳуқуқларига оид баҳслар қандай якун топади ва бу қарорлар келажакдаги сиёсий жараёнларга қандай таъсир кўрсатади?
Янги қарорлар ва суд муҳокамалари Америка фуқаролигининг келажаги учун асосий йўналишларни белгилаб бериши кутилмоқда. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
