Ғазо секторида сулҳга эришиш бўйича олиб борилаётган музокаралар Исроил ҳарбий кучларининг ҳудуддан тўлиқ чиқиб кетишига оид келишмовчиликлар сабабли турғунликка учради, деб Реутерс хабар берди. Музокаралар билан таниш бўлган фаластинлик ва исроиллик манбалар шанба куни Доҳа шаҳрида ўтказилаётган билвосита музокараларнинг мураккаб кечаётганини маълум қилди.
АҚШ томонидан таклиф этилган 60 кунлик ўт очишни тўхтатиш режасини муҳокама қилиш давом этар экан, Исроил расмийси маълум қилишича, томонлар бир ҳафтадан буён музокараларда қатнашмоқда. АҚШ президенти Доналд Трамп яқин кунларда муҳим силжиш бўлишига умид билдирди.
Ғазода шанба куни озиқ-овқат ёрдами олишга ҳаракат қилаётган 17 киши отиб ўлдирилди. Маҳаллий тиббиёт ходимлари бу ҳодисани АҚШ томонидан қўллаб-қувватланаётган ёрдам тарқатиш тизими доирасидаги навбатдаги қонли ҳодиса деб атади. БМТ маълумотларига кўра, охирги олти ҳафтада шу каби ҳолатларда камида 800 киши ҳалок бўлган.
Ҳодиса гувоҳлари ўқ отиш боши ва кўкракка қаратилганини айтишди. Исроил армияси ўз баёнотида огоҳлантирувчи ўқ узилганини билдирган бўлса-да, тергов натижасида аскар ўқидан ҳеч ким жабрланмаганини даъво қилмоқда.
Исроил ва ҲАМАС делегациялари Қатар пойтахтида босқичма-босқич ҳарбий кучларни олиб чиқиш, гаровдагиларни озод қилиш ва урушни якунлашга оид келишув устида ишламоқда. Бироқ музокаралар боши берк кўчага кирган. Исроил томони бунга ҲАМАСни айблаб, уни "келишувларга тўсқинлик қилаётган қатъий позицияда" деб атади. ҲАМАС эса жавоб тариқасида Исроилни айблаб, улар томонидан илгари сурилган талаблар келишувни тўсиб қўяётганини таъкидлади.
Фаластинлик манбага кўра, ҲАМАС Исроил томонидан тақдим этилган хариталарни рад этган. Унга кўра, режалаштирилган чиқишдан сўнг ҳам Ғазонинг тахминан 40 фоизи, жумладан, Рафаҳнинг жануби ва шимолий ҳамда шарқий ҳудудлар Исроил назорати остида қолади. ҲАМАС эса Исроилдан март ойидаги ҳужумлар олдидан мавжуд чизиқларга қайтишни талаб қилмоқда.
Исроилда эса минглаб одамлар Тел-Авивда намойишга чиқиб, ҳукуматни ҲАМАС қўлида қолаётган гаровдагиларни озод қилиш бўйича зудлик билан келишувга эришишга чақирди. Намойиш иштирокчиси Боаз Леви: “Дўстларимиз, биродарларимиз Ғазада. Энди бу урушни тугатиш вақти келди. Шу боис биз бу ерда турибмиз,” — деди.
Ғазо соғлиқни сақлаш органларига кўра, Исроилнинг уруш ҳаракатларида 57,000 дан ортиқ фаластинлик ҳалок бўлган, икки миллиондан ортиқ аҳоли ўз уйларини тарк этишга мажбур бўлган. «Замин»ни Telegram’да ўқинг!
Ctrl
Enter
Хато топдИнгизми
Иборани ажратиб Ctrl+Enter тугмасини босинг Мавзуга оид янгиликлар
