Россия сафида ўлган 66 нафар ўзбекистонлик: BBC хабари

Украинага қарши олиб борилаётган урушда Россия армияси сафида жанг қилган 66 нафар Ўзбекистон фуқароси ҳалок бўлгани ҳақида BBC ва “Mediazona” нашрлари маълум қилди. Улар тақдим этган статистикага кўра, умумий ҳисобда уруш давомида 118 139 нафар россиялик ҳарбий ҳалок бўлган ва шулардан 500 нафардан зиёди чет эл фуқаролари ҳисобланади.

Таҳлилларга кўра, Россия армияси таркибида жанг қилган хорижликлар 28 та давлат фуқароларидан иборат бўлган. Қурбонлар сони бўйича биринчи ўринда, эҳтимол, Шимолий Корея фуқаролари туради. Жанубий Корея разведкаси маълумотига қараганда, урушда ҳалок бўлган шимолийкореяликлар сони 600 нафаргача етиши мумкин. Бироқ бу борада ҳозирча расмий тасдиқ мавжуд эмас.

Марказий Осиё мамлакатлари орасида эса Тожикистон 72 нафар фуқаро билан биринчи ўринда туради. Ўзбекистон эса 66 нафар фуқаро билан иккинчи ўринда. Маълумотларга қараганда, Тожикистондан 43 нафар ва Ўзбекистондан 46 нафар шахс Россиядаги жазони енгиллаштириш ёки тўлиқ "ноллаш" ваъдаси билан урушга жалб этилган. Уларнинг кўпчилиги "Вагнер" хусусий ҳарбий компанияси билан шартнома имзолаган.

Ҳуқуқ фаоллари таъкидлашича, Россиянинг Украинага қаратилган ҳарбий ҳаракатлари кўплаб меҳнат мигрантлари учун босим воситасига айланган. Уларга жангда иштирок этиш эвазига Россия фуқаролигини тезлаштирилган тартибда олиш, депортациядан қутулиш ёки кириш таъқиқини бекор қилиш ваъда қилинган. Бундан ташқари, адвокатлар маълум қилишича, кўплаб мигрантлар Россия Мудофаа вазирлиги билан шартнома тузишга таҳдид ва мажбурлаш орқали ундалган.

Мустақил давлатлар ҳамдўстлиги (МДҲ) ҳудудидан ташқарида келганлар орасида қурбонлар сони бўйича Непал етакчилик қилмоқда – 70 нафар. Шунингдек, яна 50 нафар непаллик бедарак йўқолган. Непал ҳукумати Россияга ўз фуқароларини аниқлаш учун ДНК намуналарини юборганини маълум қилган.

Постсовет ҳудудидан келиб Россия сафида жанг қилганлар орасида Грузия фуқароларининг йўқотишлари ҳам қайд этилган — 63 нафар. Уларнинг кўпчилиги 1990-йилларда Грузия назоратидан чиққан Жанубий Осетия ва Абхазия ҳудудларидан бўлган. Кавказдан келган кўнгилликлар орасида эса собиқ ҳарбийлар ва офицерлар ҳам бор.

Шунингдек, Россия сафида урушга жалб этилганлар орасида Африка қитъасидан ҳам фуқаролар бор. Хусусан, Эфиопия, Замбия, Марказий Африка Республикаси, Танзания ва Тогодан бўлганлар. Шри Ланка ҳукумати маълумотларига кўра, камида 288 нафар мустаъфо ҳарбий Россия армиясига жалб этилган, улардан 16 нафари ҳалок бўлган.

BBC таъкидлашича, Россия сафида жанг қилаётганлар орасида “саноқли” америкаликлар ҳам бор. Бошқа томондан эса Украина армияси сафида 2-3 мингга яқин америкалик кўнгилли жанг қилмоқда.

Қизиғи шундаки, Россия қуролли тузилмалари таркибида хизмат қилиб, урушда ҳалок бўлган 54 нафар Украина фуқароси ҳам қайд этилган. Улар уруш бошланишидан олдин Украина назоратида бўлган ҳудудларда доимий рўйхатда бўлган шахслар эканлиги аниқланган.

Бу ҳолат кўрсатмоқдаки, Россиянинг Украинадаги ҳарбий ҳаракатлари фақат ўз фуқароларини эмас, балки дунёнинг турли бурчакларидан келишга мажбур бўлган одамларни ҳам ҳалокатли оқибатларга юз тутишга олиб келмоқда. «Замин»ни Telegram’да ўқинг!