Reuters ахборот агентлиги томонидан ўрганилган ҳужжатлар ва Европа хавфсизлик ходимларининг маълумотларига кўра, Хитойда ишлаб чиқарилган двигателлар Ғарб санкцияларини четлаб ўтиш мақсадида “саноат совутгичлари” номи остида Россияга юборилмоқда. Улар Россиянинг давлатга қарашли IEMZ Купол компаниясига етказилиб, Украина ҳудудига ҳужум қилишда ишлатилаётган Гарпия-A1 дронларига ўрнатилмоқда.
Санкциялар самарасиз қолмоқда
Гарпия-A1 — узоқ масофаларга учувчи ҳужумчи дрон бўлиб, Украина ҳарбий ва фуқаролик объектларига зарба беришда қўлланилмоқда. Reuters томонидан кўрилган ички ҳужжатга кўра, Купол 2025 йил давомида 6 000 дан ортиқ дрон ишлаб чиқариш бўйича Россия Мудофаа вазирлиги билан шартнома имзолаган. Апрел ойигача 1 500 дан ортиқ дрон етказилган.
Украина ҳарбий разведкаси маълумотларига кўра, бу дронлардан ҳар ойда ўртача 500 таси ишлатилмоқда.
Хитой компаниялари орқадан қўллаб-қувватламоқда
Купол аввал Xiamen Limbach Aviation Engine Co. томонидан ишлаб чиқарилган L550E двигателларидан фойдаланган. Бу компания 2024 йил октябрда Европа Иттифоқи ва АҚШ томонидан санкцияга учраган. Шундан сўнг, янги Хитой компанияси — Beijing Xichao International Technology and Trade — дрон двигателларини етказишни бошлаган.
Дипломатик кескинлик кучаймоқда
Хитой Ташқи ишлар вазирлиги бу ҳақда хабари йўқлигини билдирган ва барча икки мақсадли маҳсулотлар экспорти Хитой қонунлари ва халқаро мажбуриятларга мувофиқ назорат қилинишини таъкидлаган.
Европа Комиссияси Президенти Урсула фон дер Ляйен эртага Хитойга сафар қилиб, Хитой раҳбари Си Цзиньпин ва Бош вазир Ли Сян билан учрашади. Учрашувда Пекиннинг Россияга технологик ёрдам кўрсатишига оид хавотирлар муҳокама қилиниши кутилмоқда
