Сўнгги вақтларда ижтимоий тармоқларда қизлар орасида хитга айланган бир масала бор — у ҳам бўлса Darry Ring брендининг ҳалқаси. Cartier ёки Tiffany каби машҳур маркалар эмас, балки айнан шу хитой бренди қизлар орзусига айланди. Нега?
Нега айнан Darry Ring?
Darry Ring бу оддий ювелир маҳсулоти эмас. Унинг фалсафаси шундай: бир инсон – бир муҳаббат – бир умр. Агар кимдир бу ҳалқани сотиб олмоқчи бўлса, у ўз шахсий маълумотларини тақдим этиши ва «Ҳақиқий муҳаббат келишуви»ни имзолаши керак. Ушбу келишувга кўра, инсон умрида фақат бир мартагина бундай ҳалқани харид қила олади.
Маҳсулот ортидаги муҳаббат ҳикояси
Брендни ташкил этган Тони Чжан ва Венди Лу ўз муҳаббатларидан илҳомланиб, ҳалқалар орқали тўй ва никоҳ муносабатларига жиддий ёндашишни тарғиб қилади. Улар учун ҳалқа нафақат безак, балки муҳаббатнинг рамзи ва масъулиятни ифодалайди.
Ижтимоий тармоқларда вирусли бўлган видеолар
«Қизлар, буни барчага улашинг!» — деган видеолар TikTok ва Instagram'да кенг тарқалди. Кўплаб қизлар бу ҳалқани орзу қилиб, йигитига айнан шундай ҳалқа кераклигини таъкидлашмоқда.
Олдинги ва янги қадриятлар тўқнашуви
Ҳар қанча замонавийлашмасин, инсонлар қалбида муҳаббат ва садоқат муҳимлигича қолмоқда. Darry Ring эса бу қадриятларни рағбатлантириб, ёшлар орасида «севги учун жавобгарлик» ғоясини тарғиб қилмоқда.
«Замин»ни Telegram’да ўқинг!
