Чамадон ичидан икки ёшли қиз топилди

Янги Зеландиянинг шимолидаги Кайиока шаҳрида автобусда саёҳат қилаётган аёл чамадони ичидан икки ёшли қизалоқ топилгач ҳибсга олинди. Полиция маълумотига кўра, ҳодиса якшанба куни автобус бекатида юз берган.

Автобус йўловчиларидан бири юкхона бўлимига киришга рухсат сўрагач, ҳайдовчи чамадонлардан бири ҳаракатланаётганини пайқаган. У чамадонни очганида ичидан икки ёшли қизалоқни топган. Полиция баёнотида айтилишича, қизчанинг тана ҳарорати юқори бўлган, бироқ у жисмонан зарарланмаган.

27 ёшли аёл ҳибсга олиниб, вояга етмаган болага нисбатан бепарволик ёки қийнаш айби билан судга тортилмоқда. Қизалоқ тиббий кўрикдан ўтиш учун касалхонага юборилган.

Айни пайтда аёл билан бола ўртасидаги қариндошлик даражаси ошкор этилмади.

Янги Зеландия полицияси ушбу ҳолатда огоҳлик кўрсатган автобус ҳайдовчисини алоҳида эътироф этиб, унинг тезкор ҳаракати оғир оқибатларнинг олдини олганини таъкидлади.