Россиянинг бир нечта ҳудудларида кечаси дрон ҳужумлари қайд этилди. Тунги отишмалар ва портлашлар натижасида Самар вилоятидаги Сизран шаҳрида жойлашган нефть қайта ишлаш заводида йирик ёнғин чиққани тўғрисида бир нечта Telegram-каналлар видеолар орқали маълум қилди. Гувоҳлар завод осмонини қоплаган қора тутун ва ёниб турган минораларни тасвирга олган.
Вилоят губернатори Вячеслав Федоришевнинг айтишича, ҳудудга киришга уриниш қилган 13 та дрон аниқланган ва йўқ қилинган. Шу билан бирга, у Сизрандаги нефть заводидаги ёнғин ҳақида аниқ изоҳ бермаган. Айрим манбалар заводдаги ёнғин бир неча соат давом этгани ва ўт ўчирувчилар ҳодисани бартараф этиш учун тинимсиз ишлаганини билдирган.
Шунингдек, Курск вилоятида ҳам дрон зарбалари оқибатида ҳалокат кузатилди. Расмий маълумотларга кўра, дрон турар-жой биносига урилган ва портлаш рўй берган. Желеўзнодорожный туманида содир бўлган ушбу ҳодиса оқибатида бир аёл ҳалок бўлди, яна 10 киши турли тан жароҳатлари олган. Жабрланганлар орасида болалар ҳам борлиги айтилади.
Ҳозирда ҳодиса жойларида қутқарувчилар ва ҳуқуқни муҳофаза қилиш органлари ходимлари иш олиб бормоқда. Россия Мудофаа вазирлиги бу ҳужумларни Украина билан боғламоқда, бироқ украинa томони расмий равишда изоҳ бермаган. Маҳаллий аҳоли эса хавфсизлик чораларини кучайтиришни талаб қилмоқда.
«Замин»ни Telegram’да ўқинг!
