Европанинг “энг бахтсиз” вокзали яна ҳаётга қайтди

Испаниянинг Пиреней тоғларида жойлашган Canfranc вокзали бир пайтлар улкан лойиҳалардан бири бўлган. 1928-йилда катта тантаналар билан ишга туширилган бу бекат қисқа вақт ичида ёнғин, уруш ва инқирозлар туфайли ёпилиб кетди. У ўнлаб йиллар давомида ташлаб қўйилди ва одамлар уни “Европанинг энг бахтсиз вокзали” деб аташди.

Орадан йиллар ўтиб, бекатга янги ҳаёт бағишланди. 2023-йилда у ҳашаматли меҳмонхонага айлантирилди. Энди бу ерда бар, ресторан, бассейн ва дам олиш масканлари мавжуд. У сайёҳлар учун ҳам, маҳаллий аҳоли учун ҳам диққатга сазовор жойга айланди.

Тарихчиларнинг айтишича, бу бекат ўз даврида Европадаги энг йирик вокзаллардан бири бўлган. Унда меҳмонхона, божхона ва турли хизмат бинолари жойлашган эди. Бекатнинг ўтмиши кўплаб тарихий воқеаларга бой.

Бугун эса Canfranc нафақат меҳмонхона, балки туризм марказига ҳам айланган. Унинг қайта тикланиши маҳаллий иқтисодиётга ҳам фойда келтирмоқда.

Яқин йилларда халқаро поездлар ҳам бу вокзалга қайтиши кутилмоқда. Агар режалар амалга ошса, Canfranc яна тоғлар орқали саёҳатни жозибали қилувчи муҳим бекат бўлиб хизмат қилади.