Россия Мудофаа вазирлиги 28 август куни Украина ҳарбий-денгиз кучларига тегишли «Симферополь» номли разведка кемаси дрон зарбаси ортидан чўктирилгани ҳақида маълумот берди. Орадан кўп ўтмай ушбу ҳужум Украина ҳарбий-денгиз кучлари томонидан ҳам тасдиқланди. Таъкидлаш жоизки, Россия армияси учун бу экипажсиз катер орқали душман кемасини йўқ қилишдаги илк муваффақиятли уриниш ҳисобланади.
Маълумотларга кўра, «Думьска» нашри ёзганидек, ҳужум ярим тун атрофида амалга оширилган. «Симферополь» ўша вақтда Дунай дарёсининг қуйи қисмида ҳаракатланаётган бўлган. Зарба оқибатида кеманинг бортида йирик тешик ҳосил бўлган ва кема ағдарилиб, сувга чўккан.
Украина ҳарбий-денгиз кучлари расмий вакили Дмитрий Плетончукнинг сўзларига кўра, экипаж аъзоларининг бир қисми ҳозирда бедарак йўқолганлар рўйхатига киритилган. Бир киши ҳалок бўлган, яна бир нечта ҳарбий яралангани ҳақида хабар берилмоқда.
Бу воқеа Россия томонидан Украина кемаларига қарши денгиз дронларидан самарали фойдаланишнинг илк расмий ҳолати сифатида қайд этилди. Ҳатто, Мудофаа вазирлиги ушбу ҳужум видеосини ҳам эълон қилиб, кенг жамоатчилик эътиборига ҳавола этди.
«Рыбарь» телеграм-канали эса, дрон зарба беришдан аввал Дунай ўзани бўйлаб тахминан 25 километр масофани босиб ўтганини қайд этди. Канал муаллифларининг таъкидлашича, украиналик кузатувчилар дронни ўз техникаси деб ўйлаган бўлиши ҳам эҳтимолдан холи эмас.
Шу тариқа, «Симферополь»нинг чўктирилиши Украина ва Россия ўртасидаги денгиздаги тўқнашувлар янги босқичга ўтганини англатмоқда. Бу воқеа нафақат ҳарбий соҳада, балки геосиёсий жараёнларда ҳам жиддий акс-садо бериши шубҳасиз.
