Туркия ташқи ишлар вазири Ҳакан Фидан мамлакат Исроил билан денгиз ва ҳаво қатновларига қатъий чекловлар жорий қилинганини эълон қилди.
Унинг айтишича, энди Исроил кемалари Туркия портларига кира олмайди. Шунингдек, турк кемаларига ҳам Исроил портларидан фойдаланиш тақиқланади. Исроилга қурол-яроғ ташийдиган контейнер кемалари эса Туркия ҳудудига умуман киритилмайди.
Туркия Исроилни Ғазодаги талафотлар учун айблаб, халқаро ҳамжамиятни унга қарши чора кўришга чақирмоқда. Шу йил бошида Анқара Исроил билан барча савдо алоқаларини ҳам тўхтатган эди.
Туркия порт маъмуриятлари яқинда агентлардан кемаларнинг Исроил билан алоқаси йўқлигини ва у ерга хавфли юк олиб бормаётганини тасдиқлашни талаб қила бошлаган.
Фидан, шунингдек, Туркия Ғазога ҳаво орқали ёрдам юборишга тайёрлигини билдирди. Унинг сўзларига кўра, самолётлар ҳозир тайёр, минтақа расмийларидан рухсат кутиляпти. Исроил ҳукумати эса бу баёнотларга изоҳ бермади.
«Замин»ни Telegram’да ўқинг!
