Шимолий Корея раҳбари Ким Чен Ин Украинада Россия томонида жанг қилиб ҳалок бўлган аскарлар оилалари билан учрашди. У уларга ҳамдардлик билдириб, аскарлар хотираси учун суратларини байроққа ўраб топширди.
Маросим Пхенянда ўтказилди. Ким Чен Ин ўз нутқида аскарларни тирик қайтариб келолмагани учун афсус билдирди. Шунингдек, у ҳалок бўлганлар шарафига ёдгорлик қуришга ва уларнинг болаларига ғамхўрлик қилишга ваъда берди.
Жанубий Корея маълумотига кўра, Шимолий Корея Россияга ёрдам сифатида 15 мингга яқин аскар юборган. Улар билан бирга ракета ва қуроллар ҳам жўнатилган. Эвазига Пхенян озиқ-овқат ва техник ёрдам олгани айтилмоқда.
Ғарб расмийлари юзлаб шимолий кореялик аскар жангларда ҳалок бўлганини билдирган. Бир неча минг аскарлар эса яраланган.
Келаси ҳафта Ким Чен Ин Хитойда бўлиб ўтадиган ҳарбий парадда Россия президенти Владимир Путин билан учрашади. Сўнгги икки йил ичида бу уларнинг учинчи учрашуви бўлиб, икки давлат ҳамкорлиги кучаяётгани кузатилмоқда.
«Замин»ни Telegram’да ўқинг!
