30 август куни Покистоннинг турли ҳудудларида кучли муссон ёмғирлари юзага келди. Бу ҳақда “Daily Times” нашри хабар берди.
Лахор шаҳрида ёмғирлар кучаяр экан, тоғли Мурри ҳудудларида ҳам қаттиқ шамол ва ёмғир кузатилган. Маҳаллий ҳокимият пастликлардан иборат минтақаларда сув тошқинлари рўй бериши мумкинлиги тўғрисида аҳолини огоҳлантирди.
Кўплаб ҳудудларда, жумладан Абботобод, Наровал, Ферозвала, Бахавалпур ва бошқа минтақа марказларига ҳам муссон ёмғирлари салбий таъсир кўрсатди. Пастликларда сув тўпланиб, электр таъминотида узилишлар юзага келган. Айрим ҳудудларда қаттиқ шамол оқибатида электр узатиш линиялари узилиб, шаҳарлар қоронғу ҳолатга тушган.
Лахорда чақмоқ уриши натижасида икки нафар инсон ҳалок бўлди. Ферозвалада эса уй томининг қулаши туфайли бир аёл қурбон бўлди. Шунингдек, уч киши қаттиқ шамол оқибатида тан жароҳати олди. Қутқарувчилари зарарланган ҳудудларда аҳолига ёрдам кўрсатиш ва хавфсизлик чораларини амалга оширишда фаол ҳаракат қилмоқда.
Покистон Фавқулодда вазиятлар вазирлиги 2 сентябргача ёмғирлар давом этишини маълум қилди. Ҳокимият аҳолига эҳтиёт бўлиш ва бунданда ҳамда кучли об-ҳаво шароитига тайёр туришни тавсия этмоқда. Баъзи заиф инфратузилмага эга ҳудудлар учун эвакуация режалари ишлаб чиқилган ва фавқулодда ёрдам кўрсатиш чоралари татбиқ қилинмоқда.
Умуман олганда, Покистонда муссон ёмғирлари ёз бошидан бери тўхтовсиз ёғмоқда. Ҳисоб-китобларга кўра, 700га яқин киши табиий офат қурбонига айланган.
Шунингдек, Покистон иқлими доимо ўзгарувчан мамлакатлар қаторига киради. Минтақада сўнгги йилларда экстремал об-ҳаво ҳодисалари тобора кўпайиб бормоқда. Масалан, 2022 йилда муссон ёмғирлари туфайли мамлакатнинг учдан бири сув остида қолган ва қарийб 1700 киши ҳалок бўлган эди.
«Замин»ни Telegram’да ўқинг!
