28 август куни Исроил ҳаво ҳужуми Яман пойтахти Сана шаҳрида қонли оқибатларга олиб келди. Ҳусийлар ҳукумати раҳбари – бош вазир Аҳмад Ғалеб ар-Раҳавий ва бир қатор вазирлар ҳаётдан кўз юмди.
Маълумотларга кўра, зарба айнан навбатдаги ҳукумат йиғилиши давом этаётган вақтда амалга оширилган. SABA агентлиги ёзишича, исроиллик ҳарбий кучлар “Ансор Аллоҳ” етакчисининг нутқини эшитиш учун тўпланган юқори мартабали амалдорлар йиғилган бир нечта жойни бир вақтнинг ўзида нишонга олган. Reuters агентлиги эса ҳалок бўлганлар орасида мудофаа вазири ва бош штаб раҳбари ҳам борлигини қайд этди.
Эслатиб ўтиш жоиз, 25 август куни ҳам Исроил Санага йўналтирилган ҳаво зарбасини амалга оширган, натижада камида 10 киши ҳалок бўлган, 100 дан ортиқ фуқаро яраланган эди.
Ҳусийлар эса мунтазам равишда Исроилга қарши ракета ва дронлар йўллаб, фаластинликлар билан бирдамлигини намоён қилиб келади. Улар Қизил денгиз ва Адан кўрфази орқали ўтадиган савдо кемаларини ҳам ўққа тутмоқда. Бунга жавоб сифатида Исроил ва АҚШ ҳусийлар назоратидаги ҳудудларни, жумладан пойтахт Санани қўлга олиш учун зарбалар йўлламоқда.
Маълумки, ҳусийлар 2014 йилдан ҳокимият тепасига чиққан ва 2015 йилдан бери Сана шаҳри устидан назоратни қўлда ушлаб турибди.
Ар-Раҳавий ҳукуматни 2024 йил августидан бошлаб бошқарган эди. Энди эса унинг ўрнига ўринбосари Муҳаммад Мифтоҳ бош вазир сифатида тайинланди.
«Замин»ни Telegram’да ўқинг!
