БМТ Афғонистонда юз берган кучли зилзила оқибатида жабрланган фуқароларга ёрдам бериш мақсадида Фавқулодда вазиятларда ҳаракат қилиш марказий жамғармаси (CEРФ)дан 5 миллион АҚШ доллари ажратди.
Мазкур маблағ табиий офат ортидан қолган қутқарув ва ёрдам ишларини амалга ошириш, жабрланган аҳолига зарур озиқ-овқат, ичимлик суви, дори-дармон ва вақтинчалик турар-жой воситаларини етказиб бериш учун йўналтирилади.
БМТ Бош котиби расмий баёнотида Афғонистон халқи билан бирдамлигини билдирди. Шунингдек, ҳалок бўлганларнинг оила аъзоларига самимий таъзия йўллаб, жароҳат олганлар тезроқ шифо топишини тилади.
Ташкилот маълум қилишича, Афғонистондаги ҳамкор ташкилотлар билан биргаликда аҳоли эҳтиёжлари тезкор баҳоланмоқда. Шунингдек, зарур ҳолларда қўшимча ёрдам кучлари жалб этилиши учун маҳаллий де-факто расмийлар билан мувофиқлашув ишлари олиб борилмоқда.
Бирлашган Миллатлар Ташкилоти таъкидлашича, ҳозирги инсонпарварлик эҳтиёжлари учун мавжуд молиялаш етарли эмас. Бош котиб халқаро ҳамжамиятни қўшимча маблағ ва ресурслар ажратишга чақирди. Унинг фикрича, бу фожиали воқеага тезкор ва самарали жавоб бериш учун кўпроқ моддий ёрдам талаб этилади.
Экспертлар фикрига кўра, зилзиладан кейинги илк кунларда жамоатчиликни тоза сув, тиббий хизмат ва вақтинчалик турар-жой билан таъминлаш энг муҳим вазифа ҳисобланади. Шу сабабли, БМТ ва унинг шериклари биринчи навбатда шошилинч эҳтиёжларга йўналтирилган дастурларни амалга оширмоқда.
