АҚШ президенти Доналд Трамп Фаластиннинг ҲАМАС ҳаракатидан 20 нафар исроиллик гаровга олинганларни дарҳол озод этишни қатъий талаб қилди.
Америка етакчиси бу ҳақда шахсан Truth Social ижтимоий тармоғида ёзиб қолдирган.
“ҲАМАСга айтиб қўйинг, гаровдаги 20 кишининг барчасини (2 ёки 5 ёки 7 эмас, айнан ҳаммасини!) зудлик билан қайтарсин ва вазият кескин ўзгаради. Уруш тугайди!” – деб таъкидлади Трамп.
Эслатиб ўтамиз, 18 март куни Исроил армияси Ғазо секторида яна жанг ҳаракатларини бошлаб, анклав ҳудудига йирик зарбалар берди. Бу билан январь ойида эълон қилинган сулҳ расман бузилди.
Исроил бош вазири Бинямин Нетаняху идораси операция мақсадини изоҳлар экан, бунга Фаластин ҲАМАС ҳаракатининг воситачилар ва АҚШ президентининг махсус вакили Стивен Уиткофф орқали тақдим этилган таклифларни рад этгани сабаб бўлганини қайд этди.
Изоҳда таъкидланишича, амалга оширилган ҳарбий ҳаракатнинг асосий мақсади — барча гаровга олинган шахсларни озод этиш эди.
ҲАМАС эса, ўз навбатида, жанг ҳаракатларининг қайта бошланишига Исроил ва АҚШни айблаб чиқди.
«Замин»ни Telegram’да ўқинг!
