Украина раҳбари Володимир Зеленский яна бир бор Россия президенти Владимир Путин билан Москвада учрашиш нияти йўқлигини очиқ билдирди. Унинг айтишича, Путин музокараларни кечиктириш учун барча усуллардан фойдаланмоқда.
«Америкалик шерикларимиз бизга Путин мени Москвага таклиф қилганини айтди. Аммо менимча, агар учрашув ўтмаслигини истасангиз, мени айнан Москвага чақиришингиз керак», — деди Зеленский 4 сентябрь куни Парижда бўлиб ўтган «кўнгиллилар коалицияси» саммити якунларидан сўнг ўтказилган матбуот анжуманида.
Украина президентининг таъкидлашича, учрашувнинг ўзи «зарур», бироқ ҳозирча Россия томони вақтни чўзиш билан банд. Шу билан бирга, у Путиннинг бундай учрашув ҳақида фикр билдиришини ёмон ҳолат эмас, балки музокара эҳтимолини жонлантирувчи жиҳат сифатида баҳолади.
Эслатиб ўтамиз, 3 сентябр куни Владимир Путин Зеленский билан эҳтимолий мулоқот ҳақида сўзлаб, «агар у тайёр бўлса, Москвага келсин», деганди. Бироқ Россия расмийлари аввалроқ бундай юзма-юз учрашув фақат музокара жараёнининг сўнгги босқичидагина амалга ошиши мумкинлигини бир неча бор урғулаган эди.
«Замин»ни Telegram’да ўқинг!
