Европа комиссияси Google’нинг эгаси бўлган Америка компанияси Alphabet’ни реклама технологиялари бозоридаги устун мавқеини суиистеъмол қилгани учун 2,95 миллиард евро миқдорида жаримага тортди. Бу ҳақда халқаро оммавий ахборот воситалари маълум қилди.
Комиссиянинг изоҳлашича, Google ўз хизматларига рақобатчилар ҳисобига афзаллик бериб, реклама берувчилар ва онлайн нашриётларга босим ўтказган. Шу тариқа компания рақобат муҳитини бузгани таъкидланди. Еврокомиссия Google бундай амалиётдан воз кечиши ва хизматларига сунъий устунлик беришни тўхтатиши шарт, деган қарорга келди.
Google эса бу қарор устидан шикоят қилиш ниятида эканини билдирди. Компаниянинг норматив масалалар бўйича вице-президенти Ли-Энн Малхолланд таъкидлашича, Еврокомиссиянинг қарори «минглаб Европа компаниялари учун зарарли бўлиши, уларнинг даромад олиш имкониятларини қийинлаштириши мумкин».
Bloomberg’нинг қайд этишича, мазкур қарор Европа Иттифоқи ва Америка Қўшма Штатлари ўртасидаги савдо муносабатлари кескинлашган бир вақтда қабул қилинди. Доналд Трамп бир неча бор Европа Иттифоқининг йирик технология компанияларига қарши сиёсатини қоралаган ва Европа томонидан қабул қилинган қонунларни «Америка бизнесини чеклашга қаратилган» ҳужжатлар сифатида баҳолаган.
Бу сафар ҳам Трамп ўз муносабатини яширмади. У Еврокомиссия қарорига жавобан АҚШ қонунидаги 301-модда асосида тергов бошлаш билан таҳдид қилди. Мазкур модда президентга бошқа давлатларнинг Америка бизнесига нисбатан «адолатсиз» ҳаракатларига якка томонлама чора кўриш ҳуқуқини беради.
«Европа бугун Америкадаги яна бир буюк компания – Google’га зарба берди. Унга 3,5 миллиард долларлик жарима солишди. Бу маблағлар АҚШда инвестиция ва иш ўринларига сарфланиши керак эди», – деб ёзди Трамп.
Эслатиб ўтамиз, Google компанияси аввал ҳам Еврокомиссия томонидан бир неча бор жавобгарликка тортилган. 2017 йилда компания бозордаги устун мавқеини қонунга зид равишда ишлатгани учун 2,4 миллиард евро жарима тўлаган. 2018 йилда эса монополияга қарши қонун бузилиши учун яна 4,3 миллиард евро миқдорида жаримага тортилган эди.
Шу тариқа, Европа билан Америка ўртасидаги йирик технология компаниялари атрофидаги қарама-қаршилик янада кучайиши эҳтимол қилинмоқда.
«Замин»ни Telegram’да ўқинг!
