Буюк Британияда суд собиқ қон томир жарроҳи Нил Хопперни 32 ой муддатга озодликдан маҳрум этди. У жинсий майл сабабли ўз оёқларини кесиб ташлаган ва суғурта компаниясини алдаб, 466 минг фунт стерлингдан ортиқ товон пули олган. Бу ҳақда The Guardian ёзмоқда.
2019 йилнинг апрелида у оёқларини қуруқ муз ёрдамида музлатиб, кейинчалик ампутация қилдиришга мажбур бўлган. Нашр қайд этишича, бу унинг йиллар давомида яширин орзуси бўлиб келган ва буни жинсий завқ билан боғлаган.
Хоппер суғурта компаниясига ампутация сепсис туфайли амалга оширилганини айтиб, ёлғон маълумот берган. Олинган пулни у кемпер машина, иссиқ ванна, печка ва бошқа турли лойиҳаларга сарфлаган.
Суд уни фирибгарликда ҳамда ноқонуний сайт орқали ҳаддан ташқари порнографик материалларни сақлаганликда ҳам айбдор деб топди.
Ҳуқуқ-тартибот идоралари Хопперни, ноқонуний контент жойлаштирган ва танани экстремал тарзда ўзгартириш операцияларини уюштирган Мариус Густавсон иши доирасида аниқлаган. 2024 йилда Густавсон эркак жинсий аъзоларини олиб ташлаш ва 16 ёшдан катталарга нисбатан бошқа хавфли жарроҳликларни ташкил қилгани учун умрбод қамоқ жазосига ҳукм қилинган эди.
2023 йил март ойида Хоппер NHS тизимидаги ишидан четлаштирилди, кейинчалик тиббий рўйхатдан ҳам чиқарилди. Орадан кўп ўтмай, унинг рафиқаси ажрашиш учун ариза топширди.
«Замин»ни Telegram’да ўқинг!
