Сурияда собиқ президент Башар ал-Ассадга тегишли бўлган эксклюзив ва нодир суперкарлар коллекцияси Дамашқ шаҳридаги катта ким ошди савдосида намойиш этилди, деб хабар берилди.
Аукцион янги давлат раҳбари Аҳмад Аш-Шара томонидан расман очилди. Тадбирдан олинган маблағлар Сурия тараққиёт жамғармасига йўналтирилиши ва мамлакатнинг иқтисодий ривожига қўшилиши режалаштирилган. Муттахассислар фикрига кўра, ушбу ҳаракат нафақат коллекционерлар учун қизиқарли, балки мамлакат тараққиётига ҳам ҳисса қўшади.
Ким ошди савдонинг илк босқичида дунёга машҳур брендларга мансуб учта суперкар тақдим этилди. Улар орасида энг қимматбахоси Ferrari F50 бўлиб, унинг қиймати тахминан 3-4 миллион доллар атрофида баҳоланган. Мазкур автомобил Формула-1 технологиялари асосида ишлаб чиқилган ва дунёда атиги 349 дона мавжудлиги билан коллекциячилар диққатини тортади.
Шунингдек, аукционда Mercedes SL65 AMG Black Series ҳам сотувга чиқарилди. Дунёда фақат 300 дона ишлаб чиқарилган ушбу автомобил 670 от кучига эга юксак самарали двигател билан жиҳозланган ва бозордаги қиймати тахминан 500 минг долларни ташкил этади. Коллекциянинг яна бир эътиборга молик намунаси — Audi R8 бўлиб, у 525 от кучига эга 5,2 литрли V10 двигател билан таъминланган ва ишқибозлар орасида катта қизиқиш уйғотди.
Мазкур ким ошди Суриядаги энг йирик ва таъсирли автомобиль савдоларидан бири сифатида тарихий аҳамиятга эга бўлди. Экспертлар қайд қилишича, ушбу аукцион нафақат автомобил коллекционерлари учун муҳим, балки мамлакатнинг иқтисодий ва маданий ривожига ҳам ижобий таъсир кўрсатади.
«Замин»ни Telegram’да ўқинг!
