8 сентябр, душанба куни АҚШ Конгресси Вакиллар палатасидаги Демократик партия вакиллари жамоатчиликка қизиқарли ҳужжатни тақдим этишди. Уларга кўра, ҳужжат бугунги кунгача сиёсий майдонда тортишувларга сабаб бўлиб келаётган молиячи Жеффри Эпштейнга йўлланган почта карточкаси ҳисобланади.
Маълумотларга кўра, ушбу почта карточкасини ўтган асрнинг охири ёки йигирма йилдан кўпроқ вақт аввал АҚШ президенти Доналд Трамп томонидан Эпштейнга юборилгани даъво қилинмоқда. Демократлар бу ҳужжатни эълон қилиб, унинг мазмунига жиддий эътибор қаратдилар.
"Биз қўлимизга Трамп томонидан Эпштейнга туғилган куни муносабати билан йўлланган хатни олдик. Президент эса бундай хат умуман йўқлигини айтган эди. Аммо почта карточкасида уларнинг “ажойиб сир” ҳақида ёзишганини кўриш мумкин. Трамп нима сирни яширмоқда? Эпштейн иши юзасидан барча ҳужжатларни очиқласин", — дея изоҳ берди демократлар ўз баёнотларида.
Эълон қилинган почта карточкасида аёл танасининг схематик тасвири акс этган бўлиб, унинг устида «Жеффри» ва «Доналд» ўртасидаги турли ифода ва сўзлар ёзилган. Карточка охирида эса шундай ибора қайд этилган: «Туғилган кунингиз билан — ва ҳар кунингиз янги ажойиб сирлар билан тўлсин».
Сиёсатчилар фикрича, мазкур ҳужжатнинг ошкор қилиниши Трамп ва Эпштейн ўртасидаги муносабатларга ойдинлик киритиши мумкин. Чунки бу икки шахс ҳақидаги тортишувли хабарлар бир неча йилдан бери АҚШ жамоатчилиги ва оммавий ахборот воситаларида қизғин муҳокама қилиниб келмоқда.
Таҳлилчилар эса демократларнинг бу қадамини сиёсий жараёнлардаги навбатдаги босим сифатида баҳолашмоқда. Уларга кўра, почта карточкасининг эълон қилиниши ортидан яна янги саволлар пайдо бўлади ва уларнинг аксарияти жамоатчилик томонидан жавоб талаб қилади.
АҚШ Конгрессида эълон қилинган мазкур почта карточкаси сиёсий майдонда яна бир бор қизғин баҳсларга олиб келди. Трамп ва Эпштейн ўртасидаги «сирли муносабатлар» ҳақидаги тортишувлар яна авж олиши мумкин. Демократлар эса бу ҳужжатни қўлга киритиш орқали янги сиёсий кураш воситасига эга бўлди.
«Замин»ни Telegram’да ўқинг!
