Сўнгги йилларда Аргентина ҳукумати хорижликлар орасида кенг тарқалган “туғруқ туризми” амалиётига чек қўйиш бўйича қатъий ва мукаммал чораларни жорий қилди. Бу ҳақда Аргентина Республикасининг Россиядаги элчиси Энрике Игнасио Феррер Виейра Россия оммавий ахборот воситаларига берган интервьюсида маълум қилди.
Дипломат таъкидлаганидек, эндиликда Аргентина ҳудудида фарзанд кўрган хорижликлар, жумладан россиялик фуқаролар ҳам, бола туғилгандан сўнг дарҳол мамлакат фуқаролигига эга бўла олмайди. Энди фуқаролик натурализация тартиби орқали берилади ва бунда шахс 18 ёшдан катта бўлиши, мамлакат ҳудудида доимий яшаш жойига эга эканлигини расман исботлаши ва камида икки йил мобайнида Аргентинани тарк этмай қонуний ҳаёт кечирган бўлиши талаб этилади.
Виейра таъкидлаганича, илгари айрим россиялик аёллар Аргентинага визасиз ташриф буюриб, ҳомиладорлигини яширган ва давлатнинг бепул тиббиёт ҳамда ижтимоий хизматларидан фойдаланиб, фарзанд туғилгандан сўнг мамлакатдан тезда чиқиб кетган. Шу сабабли Аргентина ҳукумати ушбу тартибни ўзгартиришга мажбур бўлди.
Расмий статистика кўрсаткичларига кўра, 2022–2023 йиллар давомида Аргентинага 23 мингдан ортиқ россиялик кириб келган. Улардан катта қисми мамлакат фуқаролигини олишни мақсад қилган, бироқ кўпчилиги узоқ муддат қолмаган. Шу билан бирга, 2023 йилда Россиядан келганларга берилган яшаш рухсатномалари сони рекорд даражага чиқиб, 3 700 тага етди.
Аргентина ҳукумати миграция сиёсатини қайта кўриб чиқиш орқали давлатнинг таълим, соғлиқни сақлаш ва ижтимоий ҳимоя тизимларидан ноқонуний фойдаланишнинг олдини олишни мақсад қилган. Шу билан бирга, расмийлар қонуний тартибда мамлакатда яшашни истаган шахсларни қўллаб-қувватлашини ҳам таъкидлади.
Шунингдек, илгари Аргентинага туғилган боланинг ота-онаси паспорт олишнинг соддалаштирилган тартибидан фойдаланиб, фуқароликка ариза топшириш учун кутишга мажбур бўлмаган. Энди эса бу имконият ҳам тугатилди.
Аргентина паспорти халқаро миқёсда юқори қудратга эга бўлиб, 170 дан ортиқ давлатга визасиз саёҳат қилиш имконини беради. Шу сабабли сўнгги йилларда бу ҳужжатни олишга қизиқиш сезиларли даражада ошган эди.
«Замин»ни Telegram’да ўқинг!
