Қозоғистонда ўзбек компаниялари сони 56 фоизга кўпайди
Қозоғистонда ўзбек компаниялари сони 2024 йил май ойидаги 4 595 тадан 2025 йил сентябр ойида 7 190 тага етиб, бир йил ичида 56 фоиздан зиёд ошди. Ҳозир мамлакатда фаолият юритаётган хорижий ва қўшма корхоналар сони 74 мингдан ортиқ бўлиб, бу 2024 йил октябридаги 59 мингдан зиёд кўрсаткичдан юқори. Қозоғистонда энг кўп хорижий компания Россияга тегишли бўлиб, уларнинг 23 105 таси рўйхатдан ўтган ва 17 496 таси фаолият юритмоқда.
Қозоғистон хорижий сармоя учун ҳамон энг қизиқарли йўналишлардан бири бўлиб қолмоқда. Zakon.kz нашрининг маълум қилишича, мамлакатда хорижий мулкдорликка эга юридик шахслар ва чет эл компанияларининг филиаллари сони йил давомида ўтган йилнинг шу даврига нисбатан 6 фоизга ўсган.
Бандлик ва меҳнат муносабатлари вазирлиги берган маълумотларга кўра, ҳозирда Қозоғистонда фаолият юритаётган хорижий ва қўшма корхоналарнинг умумий сони 74 мингдан ошиб кетган. Бу 2024 йил октябр ойида қайд этилган 59 мингдан зиёд кўрсаткичга нисбатан анча катта ўсиш ҳисобланади.
Мутахассислар фикрича, мамлакатнинг географик яқинлиги ва иқтисодий ҳамкорлик алоқалари хорижий сармоядорлар учун асосий омил бўлиб хизмат қилмоқда.
Қозоғистонда рўйхатдан ўтган ва ҳозирда ишлаётган чет эл компаниялари сони қуйидагича тақсимланган:
-
Россия: 23 105 та рўйхатдан ўтган, уларнинг 17 496 таси фаол;
-
Ўзбекистон: 7 190 (5 473 таси фаол);
-
Хитой: 6 790 (4 950);
-
Туркия: 5 236 (3 344);
-
Қирғизистон: 3 110 (1 943);
-
Озарбайжон: 1 612 (1 172);
-
Украина: 1 298 (895);
-
Германия: 964 (736);
-
Беларус: 914 (731).
Манбаларга кўра, инвестиция оқимларининг таркибида ўзгаришлар кузатилмоқда. Масалан, Россия ва Туркия компаниялари сони бироз пасайган: россияликлар 23 533 тадан 23 105 тага, турклар эса 5 444 тадан 5 236 тага. Шу билан бирга, Хитойдан келган компаниялар сони 5 217 тадан 6 790 тагача ортиб, анча юқори суръатда ўсиш қайд этган.
Бироқ энг кескин динамика Ўзбекистон ҳиссасига тўғри келмоқда. Агар 2024 йил май ойида Қозоғистонда ўзбек компаниялари сони 4 595 та бўлган бўлса, 2025 йил сентябр ойига келиб бу рақам 7 190 тага етди. Яъни бир йил ичида 56 фоиздан зиёд ўсиш қайд этилган.
Таҳлилчиларнинг таъкидлашича, бу ҳолат Марказий Осиёда иқтисодий интеграция ва ўзаро ҳамкорлик тобора кучайиб бораётганидан далолатдир.
Изоҳлар 0
…