Independent нашрининг ёзишича, АҚШнинг собиқ президенти Жо Байден ва унинг оиласи молиявий жиҳатдан жиддий қийинчиликларга дуч келмоқда. Маълумотларга кўра, Байденларнинг қарзлари қарийб 800 минг долларга етган, шу жумладан, Делавэрдаги Реҳобот-Бич шаҳрида жойлашган уй учун ипотека тўловлари ҳам бор.
Собиқ президент ва узоқ йиллик сенатор сифатида Жо Байденнинг йиллик пенсияси ва нафақаси 416 минг долларни ташкил қилади. Аммо бу маблағ оиланинг кундалик харажатларини тўлиқ қоплашга етарли бўлмаяпти. Ҳозирда Байденнинг қўшимча даромад манбалари ҳам йўқ.
Президентлик даврида орттирган обрў-эътиборини тижоратга айлантириш Байден учун осон кечмаяпти. Кўплаб компаниялар уни қимматбаҳо маърузаларга таклиф қилишдан воз кечган, сиёсий иттифоқчилари эса аста-секин ундан узоқлашмоқда. Шу сабабдан, Байденга маърузалар учун 300-500 минг доллар тўлашга тайёр бўлган буюртмачилар топилиши қийинлашган. Ҳозирги ҳолатда оиланинг асосий умиди – унинг эсдаликларини чоп этишдан кутилган тахминан 10 миллион долларлик даромадга қаратилган.
Бироқ бу рақам собиқ президент Барак Обаманинг китоблари сотилиши орқали қўлга киритган 60 миллион доллар билан таққосланганда жуда кичик кўринади.
Шу билан бирга, Жо Байден простата саратонига қарши кураш олиб бормоқда. Унинг турмуш ўртоғи Жилл Байден эса ўқитувчилик фаолиятини тўхтатиб, ҳақ тўланмайдиган жамоатчилик ишлари билан шуғулланмоқда. Оиланинг яна бир оғир юки – ўғли Ҳантер Байденга тегишли. Унинг алимент бўйича бир неча миллион доллар қарзи бор ва унинг китоблари, расмлари ҳамда оммавий чиқишларига қизиқиш сўнгандан сўнг даромад манбалари кескин қисқарган.
Молиявий қийинчиликлар ва соғлиқ муаммолари сабаб Байденлар оиласи ҳозир айни пайтда жиддий синовлардан ўтмоқда.
«Замин»ни Telegram’да ўқинг!
