Илм-фан оламида сенсация сифатида қабул қилинган янгиликка кўра, АҚШнинг Colossal Biosciences номли биотехнология стартапи XVII асрда бутунлай йўқ бўлиб кетган додо қушини қайта тирилтириш лойиҳасини амалга оширишга киришди. Bloomberg нашри тарқатган хабарда айтилишича, компания бу мақсадга етиб бориш учун етти йил муддат белгилаган.
Компания олимлари аллақачон додонинг энг яқин қариндошларидан бири ҳисобланган каптар туридан олинган бирламчи жинсий ҳужайраларни лаборатория шароитида етиштиришга муваффақ бўлишган. Бу тажриба келгусида додони генетик жиҳатдан қайта яратиш имконини очиб бериши мумкин.
Colossal Biosciences лойиҳани амалга ошириш учун 120 миллион доллардан ортиқ маблағ жалб этган ва шу тариқа компаниянинг умумий молиялаштириш ҳажми 555 миллион долларга етган. Стартапнинг бозор қиймати эса 10,3 миллиард долларга баҳоланмоқда. Яқин йилларда Техас штатида махсус қушларни ўрганиш ва генетик тадқиқот марказини қуриш ҳам режалаштирилган.
Бу стартап аввалроқ “қўрқинчли бўри”ни қайта тирилтириш орқали ҳам кўпчилик эътиборини қозонган эди. Олимлар тошга айланган қолдиқлардан олинган намуна ва замонавий кулранг бўриларнинг генларини уйғунлаштириб, анча каттароқ ҳажмдаги янги турни дунёга келтиришган. Ушбу тажриба натижасида ҳозирги бўрилардан 20–25 фоизга каттароқ бўлган ҳайвонлар яратилган. Бироқ бу лойиҳа кенг баҳсларга сабаб бўлган, чунки айрим мутахассислар таъкидлашича, яратилган янги тур ҳақиқий қўрқинчли бўри эмас, балки уларнинг узоқ қариндошига яқин бўлган генетик комбинациядир.
«Замин»ни Telegram’да ўқинг!
