АҚШ президенти Дональд Трамп Европа мамлакатларини миграция инқирозини бартараф эта олмаётгани учун кескин танқид қилди.
У Нью-Йорк шаҳрида бўлиб ўтаётган БМТ Бош Ассамблеясининг 80-сессиясидаги нутқида шу ҳақда гапирди.
Трампнинг таъкидлашича, қитъада мигрантлар томонидан амалга оширилаётган жиноятлар сони тобора кўпаймоқда. Шу билан бирга, Вашингтон бу муаммога ечим топганини таъкидлади.
— Ишонинг, мен бу масалаларни яхши биламан. Мамлакатларингиз ҳалокат йўлига кириб бормоқда. Америкада биз назоратсиз миграцияни тўхтатиш учун қатъий чоралар кўрдик. Чегарадан ноқонуний ўтганларни ушлаб, депортация қилишни бошлагандан кейин улар келишни тўхтатди, — деди у.
Трампнинг сўзларига кўра, Европа ҳозир мисли кўрилмаган ноқонуний муҳожирлар тўлқинига дуч келган ва бу ҳолатга қарши ҳеч қандай самарали чора кўрилмаяпти.
«Замин»ни Telegram’да ўқинг!
