Доналд Трампнинг АҚШ 45- ва 47-президенти сифатидаги расмий портретлари орасида автоперо — автоматик имзо қўйиш қурилмаси тасвири пайдо бўлди. Ушбу сурат Оқ уйнинг ижтимоий тармоқдаги саҳифасида 24 сентябр куни жамоатчиликка эълон қилинди.
Маълумотларга кўра, автоперо Жо Байденнинг президентлик даврининг сўнгги босқичларида қўлланилган. Хусусан, маҳбусларни афв этиш ёки чиқарилган ҳукмларни юмшатиш каби қарорларни расмийлаштиришда айнан шу қурилмадан фойдаланилган. Байденнинг ўзи бу қарорларни шахсан маъқуллаганини таъкидлаган, ёрдамчилари эса «жуда кўп ҳужжатлар юритилгани» сабабли автоперодан амалий мақсадда фойдаланишга мажбур бўлганини айтган.
Бироқ Доналд Трамп бу усулни қонуний ҳисобламайди. Унинг фикрича, Байденнинг афв тўғрисидаги қарорлари ҳақиқий кучга эга эмас, чунки уларда шахсий дастхат эмас, балки автоперо орқали қўйилган имзо мавжуд. Трампга кўра, мазкур қурилмадан собиқ президентнинг ўзидан бехабар ҳолда фойдаланишган. Байден эса бу айбловларни кескин рад этиб келмоқда.
Шу билан бирга, Трамп иккинчи президентликка сайланганидан сўнг, Оқ уйдаги расмлар тартибида ҳам ўзгаришлар қилди. Жумладан, у собиқ президент Барак Обаманинг портретини қасрнинг ёпиқ қисмига кўчиришни буюрган. Шунингдек, катта Жорж Буш ва кичик Жорж Буш портретлари ҳам камроқ кўринадиган жойларга кўчирилгани маълум қилинди.
Бу воқеа нафақат Оқ уйнинг ички анъаналари, балки президентлик ҳужжатлари қонунийлиги ва уларнинг расмий кучига оид мунозараларга ҳам катта туртки берди. Трамп тарафдорлари Байден давридаги афвлар ҳақиқий эмаслигини таъкидласа, Байден томони бу усулни қонуний ва зарур деб ҳисобламоқда.
«Замин»ни Telegram’да ўқинг!
