Канада почтаси фаолиятида катта ўзгаришлар кутилмоқда. Мамлакат жамоат ишлари ва харидлар вазири Жоэл Лайтбаунднинг маълум қилишича, почтани уйма-уй етказиб бериш деярли тўлиқ тўхтатилади.
Вазир таъкидлашича, почта хизмати молиявий жиҳатдан “экзистенциал инқироз”га юз тутган. Ҳозирда у кунига тахминан 10 миллион Канада доллари (7,2 миллион АҚШ доллари) миқдорида зарар билан ишламоқда. Давлатнинг доимий кўмаги эса муаммони ҳал этолмайди.
Ислоҳотлар натижасида почта етказиш муддати ўртача 3–4 кундан 3–7 кунгача узайиши мумкин. Шунингдек, айрим бўлимлар ёпилади ва тахминан тўрт миллион канадалик уйига хат етказиб олиш имкониятисиз қолади.
Шу муносабат билан, Корхоналар фаолиятини текшириш комиссияси уйларига почта етказилмайдиган аҳоли учун жамоат жойларида қўшимча почта қутиси ўрнатишни таклиф қилган. Бу ўзгаришлар аҳолининг кундалик турмушига катта таъсир кўрсатиши кутилмоқда.
“Zamin”ни Telegram'да ўқинг!
