АҚШ сиёсий майдонида яна катта сукутдан кейин қизғин баҳслар бошланди. Давлат котиби Марко Рубио мамлакатнинг кейинги президенти ким бўлиши мумкинлиги ҳақида фикр билдириб, бу масалада жамоатчилик эътиборини янада кучайтирди. Бу ҳақда у Fox News телеканалига берган интервьюсида маълум қилди, деб хабар берди Reuters.
Рубио сўзларига кўра, ҳозирги вице-президент Жей Ди Венс келгуси сайловларда Республика партиясидан президентликка энг кучли номзод сифатида қаралмоқда. “Менимча, агар у бундай қарорга келса, Америка Қўшма Штатлари вице-президенти Жей Ди Венс кейинги Республика партиясидан асосий номзод бўлади”, — деди Рубио.
Унинг таъкидлашича, Венс нафақат сиёсий тажрибаси, балки шахсий қобилияти билан ҳам мамлакат келажаги учун катта имкониятларга эга. Рубио уни “яхши дўст ва салоҳиятли етакчи” сифатида таърифлаб, унинг фаолиятини юқори баҳолаган. Шунингдек, Давлат котиби Венс ҳозирдаги президент жамоаси билан ҳамоҳанг ишлаб, Доналд Трампнинг сиёсий дастурини амалга оширишда фаол иштирок этаётганини таъкидлади.
Охирги ойларда Жей Ди Венснинг сиёсий келажаги ҳақида турли таҳлиллар ва баҳслар тобора кўпаймоқда. Трампнинг ўзи ҳам 2025 йил август ойида уни MAGA (Make America Great Again) ҳаракатининг “энг эҳтимолий вориси” деб атаган эди. Бу эса унинг партия ичидаги мавқеини янада мустаҳкамлади.
Reuters ва Newsweek манбалари маълумотларига кўра, айнан Венс ва Рубио Трампдан кейин Республика партиясидаги асосий етакчилар сифатида кўрилмоқда. Бу икки сиёсатчи Трампнинг ғояларини янги шаклда давом эттириш имконига эга деб баҳоланмоқда.
Жей Ди Венс эса бир неча бор омма олдида агар Трампга нимадир бўлса, президентлик вазифасини бажаришга тайёр эканини очиқ айтган. Сиёсий кузатувчиларнинг фикрича, унинг вице-президент сифатидаги фаолияти унга катта сиёсий тажриба берди ва сайловчилар олдидаги обрўсини мустаҳкамлади.
Рубио эса ҳозирча ўз номзодини илгари суриш нияти йўқлигини билдирган бўлса-да, Венсни “кучли ва истиқболли” сиёсатчи сифатида кўришини яширмади. Унинг фикрича, Венснинг сиёсий дунёқараши Америка элитаси орасида ҳам қўллаб-қувватланмоқда.
Шу тариқа, АҚШда 2028 йилги президентлик сайловига оид дастлабки баҳолар ва тахминлар аллақачон жонлана бошлади. Кўпчилик экспертлар Вашингтон сиёсий саҳнасида янгиланиш даври бошланиши мумкинлигини таъкидламоқда — ва бу жараёнда Жей Ди Венснинг номи аллақачон марказий ўринни эгаллаб бўлган.
“Zamin”ни Telegram'да ўқинг!
