Оқ уй раҳбари Доналд Трамп Россия президенти Владимир Путин билан телефон орқали суҳбатлашганини маълум қилди. Унинг таъкидлашича, мулоқот жуда самарали ва муҳим натижаларга бой бўлган, деб хабар берди Reuters.
Трамп ўз ижтимоий тармоқ саҳифасида ёзишича, Путин уни ва АҚШни Яқин Шарқда “асрлар давомида интизор бўлинган тинчлик” билан табриклаган. Буни у минтақадаги катта дипломатик ютуқ сифатида баҳолаган. Президент фикрича, Яқин Шарқдаги бу ижобий силжишлар Москва ва Киев ўртасидаги музокаралар жараёнини тезлаштириши мумкин.
Трамп таъкидлашича, Путин суҳбат чоғида биринчи хоним Мелания Трампга ҳам алоҳида миннатдорчилик билдирган. Унинг сўзларига кўра, Мелания украин болалар тақдири билан қизиқиб келаётгани Кремл томонидан юқори баҳоланган. “У жуда миннатдор бўлди ва бу иш давом этишини айтди”, дея ёзди Трамп.
Шу билан бирга, икки давлат раҳбарлари Украинадаги можаро тугагач, Россия ва АҚШ ўртасидаги савдо соҳасидаги янги имкониятлар ҳақида ҳам суҳбатлашгани маълум қилинди. Трампнинг таъкидлашича, “келаси ҳафтада икки мамлакатнинг олий даражадаги маслаҳатчилари учрашуви бўлиб ўтади”. Унда АҚШ делегациясига давлат котиби Марко Рубио бошчилик қилиши кутилмоқда. Учрашув жойи ҳозирча аниқланмаган.
Шу билан бирга, Трамп Путин билан шахсий мулоқотни Венгрия пойтахти Будапештда ўтказиш ниятида эканини ҳам эълон қилди. “Биз келишилган жойда учрашиб, Россия ва Украина ўртасидаги бу урушга чек қўйиш имкониятини муҳокама қиламиз”, деди у.
Трампнинг айтишича, у эртага Овал кабинетда Украина президенти Владимир Зеленский билан учрашиб, Путин билан бўлган суҳбат ва бошқа муҳим масалаларни муҳокама қилади. “Бугунги телефон орқали мулоқот катта илдамлашув бўлди, деб ҳисоблайман”, — дея хулоса қилди Трамп.
“Zamin”ни Telegram'да ўқинг!
