Ҳиндистоннинг Бихар штатида жуда ноодатий ҳодиса рўй берди. 74 ёшли собиқ ҳарбий Моҳан Лал тириклигида ўзининг дафн маросимини ўзи ташкил қилди. Унинг сўзларига кўра, бу орқали одамлар унинг ўлимига қандай муносабат билдиришларини ва ким чин дилдан қайғуришини билишни хоҳлаган. Бу ҳақда Gulf News нашри хабар берди.
Ҳодиса Гая туманидаги Кончи қишлоғида бўлиб ўтган. Моҳан Лал ўзини марҳум сифатида тобутга ётқизган, мотам қўшиқлари янграган ҳолда қишлоқ кўчалари орқали “дафн маросими” ўтказилган. Ҳатто ҳақиқий дафн урф-одатларига хос барча ҳаракатлар амалга оширилган.
Маълумотларга кўра, Лал бу “шоу”ни шахсан ўзи режалаштирган. У қишлоқ аҳолисининг барчаси келиб иштирок этишини хоҳлаган. Одамлар йиғлаб, мотам тутган вақтда, у бирдан тобутдан туриб оломонни ҳайратда қолдирган. Шундан сўнг рамзий ҳайкалча ёқилиб, катта зиёфат ташкил этилган.
Нега у бу ишни қилди, деган саволга Моҳан Лал шундай жавоб берган:
“Одам ўлгач, унинг тобутини кўтаришади. Мен эса тириклигимда буни кўрмоқчи бўлдим — халқимнинг ҳурмати ва меҳрини ҳис этгим келди.”
Қишлоқ аҳолиси Лални ҳурмат қилади. Сабаби — у илгари ёмғир мавсумида дафн муаммосини енгиллаштириш учун замонавий крематорий қурдирган. Бу ишлар орқали одамлар уни инсофли ва халқпарвар инсон сифатида билади.
Ҳиндистон ОАВ ёзишича, Моҳан Лални бу ишга ўзига нисбатан муҳаббат ва эътибор етишмаслиги ундаган бўлиши мумкин. Унинг “дафни” қишлоқда катта шов-шувга сабаб бўлган ва кўплаб одамлар бу ҳолатни нафақат ғалати, балки ҳаёт ҳақида ўйлантирувчи ҳодиса деб баҳолаган.
Моҳан Лал ҳозир ҳам қишлоқда фаол ҳаёт кечирмоқда ва ўзини “бир бор ўлган, энди ҳақиқатан тирик” деб ҳазил билан айтади.
“Zamin”ни Telegram'да ўқинг!
