Бангладеш пойтахти Даккадаги Ҳазрат Шаҳжалал халқаро аэропортида 18-октябрь куни катта ёнғин келиб чиқди. Бу ҳақда Gulf News нашри хабар берди.
Маълумотларга кўра, ёнғин аэропортнинг юклар сақланадиган қисмида соат 14:30 атрофида бошланган. Ҳодиса сабаб барча парвозлар вақтинча тўхтатилган ва йўловчилар хавфсиз ҳудудларга эвакуация қилинган. Ёнғинни ўчириш учун 36 та махсус отряд, жумладан, аэропортнинг ички ёнғин хизмати ва Бангладеш ҳаво кучлари жалб этилган.
Аэропорт директори Масудул Ҳасан Масуд ҳолатни тасдиқлаб, фавқулодда чоралар кўрилаётганини маълум қилган. Унинг сўзларига кўра, барча самолётлар хавфсиз ҳудудга йўналтирилган.
Biman Bangladesh Airlines вакили Кавсер Маҳмуднинг таъкидлашича, ёнғин бутун юкхона ҳудудини қамраб олган. Ҳодиса жойига фуқаролик авиацияси, ёнғин хизмати, денгиз ва ҳаво кучлари ҳамда чегара қўриқлаш бўлинмалари етиб келган.
Inter-Services Public Relations ташкилоти маълум қилишича, ҳозирда ёнғинни тўлиқ бартараф этиш ишлари олиб борилмоқда. Рейслар вақтинча бекор қилинган ва айрим парвозлар Чаттограммадаги Шоҳ Аманат ҳамда Силҳетдаги Осмони халқаро аэропортларига йўналтирилган.
Юклар жойлашган омборда катта моддий зарар кузатилган. Бангладеш Freight Forwarders Association директори Насир Уддиннинг айтишича, халқаро курьер хизматларининг юклари сақланадиган ҳудуд бутунлай ёниб кетган. Шунингдек, яқиндаги кимёвий омборхоналардан бирида ҳам ёнғин маълум қилинган.
Ҳозирча ҳалок бўлганлар ёки оғир жароҳатланганлар ҳақида расмий маълумот берилмаган. Аммо ёнғин сабаблари ва келиб чиқиш манбаи бўйича тергов ишлари бошланган.
Ҳукумат ва аэропорт маъмурияти аҳолини хотиржамликка чақирган ҳолда, ёнғин назорат остига олинганини билдирган. Шунга қарамасдан, Дакка аэропортидаги парвозлар фаолияти вақтинча чекланган ҳолда қолмоқда.
“Zamin”ни Telegram'да ўқинг!
