Флоридада Доналд Трампнинг хавфсизлиги билан боғлиқ янги хавотирли ҳолат қайд этилди. АҚШ махфий хизмати агентлари Палм-Бич шаҳридаги Air Force One самолёти қўнадиган майдон яқинида дарахтга ўрнатилган ов креслосини топишган. Бу жойдан президент самолётининг лойиҳавий йўналиши аниқ кўриниб туради.
Хавфсизлик ходимлари бу ҳолатни тасодиф деб баҳоламай, эҳтимолий суиқасдга тайёргарлик сифатида кўрмоқда. Терговчиларнинг фикрича, бу кресло махсус кузатув ёки снайпер позицияси сифатида фойдаланилган бўлиши мумкин.
Мазкур ҳолат Трампнинг шахсий хавфсизлиги билан боғлиқ хавотирларни янада кучайтирди. Сабаби, охирги бир ярим йил ичида президентга қарши бир неча бор суиқасд уринишлари қайд этилган.
Эслатиб ўтамиз, илк ҳужум 2024 йил ёзида содир бўлган, аммо ФҚБ (Федерал қидирув бюроси) ҳужумчилар ёки уларнинг шерикларини тўлиқ аниқлай олмаганди. Ортидан яна бир мерган — Раян Раут — қўлга олинган ва умрбод қамоқ жазосига ҳукм қилинган. Кейинроқ у қамоқхонада ўз жонига қасд қилишга уриниб, жуда оғир аҳволга тушгани ҳақида маълум қилинган.
Америка сиёсий муҳитида эса янги суиқасд уриниши мамлакатда жиддий инқирозни келтириб чиқариши мумкинлиги айтилмоқда. Қонун бўйича бундай ҳолатда ҳокимият Трампнинг сиёсий ҳамроҳи — вице-президент Жей Ди Венс қўлига ўтади. Аммо таҳлилчиларнинг фикрича, бу ўзгаришнинг оқибатини олдиндан башорат қилиш жуда қийин бўлади.
Қолаверса, Венснинг ўзи ҳам хавфсизлик хатаридан қутулиб қолган — у иштирок этган кортеж устида портлаган снаряддан бир неча дақиқа илгари узоқлашгани маълум қилинган.
Вашингтондаги манбаларнинг сўзларига кўра, ҳозирда маъмуриятнинг барча юқори лавозимли амалдорлари шахсий хавфсизлик чораларини кучайтира бошлаган. Федерал қидирув бюроси раҳбари Кеш Пател ўз агентларига тўлиқ ишонмай, хусусий қўриқлаш хизматидан фойдаланаётгани айтилмоқда. Шу каби чорани мудофаа вазири Пит Хегсет ҳам кўрган — у “навбатдаги эҳтимолий нишон” бўлиши мумкинлигини инкор этмаяпти.
АҚШда сиёсий тортишувлар ортида хавфсизлик мавзуси яна кун тартибининг марказига чиқди. Суиқасд таҳдидлари фонида мамлакатда сиёсий барқарорлик мувозанати синовга тушаётгани айтилаяпти.
“Zamin”ни Telegram'да ўқинг!
