Машҳур супермодел ва тадбиркор Тайра Бенкс ўзининг янги ғояси билан яна бир бор эътибор марказида. Унинг Smize & Dream компанияси Hot Mama деб номланган “иссиқ музқаймоқ”ни сотувга чиқарди, деб ёзади CNN.
Маълумотларга кўра, компания Австралияда аллақачон катта муваффақиятга эришган. Тайра энди лойиҳани АҚШда ҳам кенгайтиришни режалаштирмоқда — яқин вақтларда мамлакатда махсус Ҳот Мама кафелари очилади.
Бенкс ижтимоий тармоқларда маҳсулотни тарғиб қилиб, унинг оддий ичимликлардан фарқли эканини таъкидлади:
“Бу латте ҳам эмас, иссиқ шоколад ҳам эмас. Бу — суюлтирилган иссиқ музқаймоқ! Суюқ, илиқ ва ичиш учун тайёр. Буни ичиш мумкин, болам,” — дейилади реклама ролигида.
Ҳот Мама оддий музқаймоқ эмас — у махсус усулда чайқалиб, иситилади ва натижада суюқ, қаймоқсимон ва юмшоқ консистенсия ҳосил қилади. Бу эса уни тўғридан-тўғри стакандан ичиш имконини беради.
Ижтимоий тармоқларда янги маҳсулот муҳокамаси қизғин. Айримлар бу ғояни “гениал” деб баҳолашса, бошқалар ҳануз тушуниб улгурмаяпти — музқаймоқни иссиқ қилиб ичиш қай даражада мантиқий?
Шундоқ бўлса-да, Тайра Бенкснинг “иссиқ музқаймоқ”и ҳозирнинг ўзидаёқ дунё бўйлаб қизиқиш уйғотмоқда.
“Zamin”ни Telegram'да ўқинг!
