Россиянинг Украинага уюштирган сўнгги ҳужумлари натижасида камида етти киши, жумладан, икки бола ҳалок бўлди. Харков шаҳридаги боғча ва Киев вилоятидаги уйлар зарба остида қолди. Расмийларга кўра, 27 киши жароҳат олган, уларнинг орасида болалар ҳам бор.
Бу воқеа АҚШ президенти Доналд Трамп ва Россия раҳбари Владимир Путин ўртасидаги Будапештда бўлиши керак бўлган учрашув бекор қилингани эълон қилингандан сўнг содир бўлди. Трамп “самарасиз учрашувни истамаслигини” айтган. Зеленский эса бу ҳужумлар Россияга босим етарли эмаслигини кўрсатганини билдирди.
Кремл вакили Дмитрий Песков эса учрашувга тайёргарлик давом этаётганини маълум қилди. Унинг сўзларига кўра, “икки президент ҳам учрашувдан манфаатдор”, аммо аниқ сана ҳали келишилмаган.
Зеленский Норвегияга ташрифи давомида Трампдан узоқ масофали “Tomahawk” ракеталарини олишга уриниб кўрганини, аммо бу масала очиқ қолганини айтди. У Трампнинг фронтни музлатиш таклифини “яхши муроса” деб атаган, аммо Путин бунга рози бўлмаслигини таъкидлади.
Украина ҳарбийлари ҳужумлардан олдин Россиянинг Брянск вилоятидаги кимё заводига зарба берганини билдирди. Улар заводда Россия томонидан урушда ишлатиладиган портловчи моддалар ва ёқилғи ишлаб чиқарилгани ҳақида маълумот берган.
