АҚШ президенти Доналд Трамп Россия–Украина можаросини тўхтатиш мақсадида Киев таклиф этилган «тинчлик режаси»га 27 ноябргача жавоб бериши кераклигини маълум қилди. У бу ҳақда Fox News’га берган интервюсида айтиб, Миннатдорлик кунигача аниқ позиция кутилаётганини қайд этди. Трампнинг фикрича, айнан шу муддат музокараларни реал келишувга айлантириш учун энг мақбул вақт ҳисобланади.
У, шунингдек, Украина учун мавжуд танлов оғирлигини ҳам таъкидлаб ўтди: ҳудудларни йўқотиш хавфи, халқаро ҳамкорнинг қўллаб-қувватловисиз қолиш эҳтимоли ва сурони кучаяётган қиш. АҚШ матбуотида тарқалган маълумотларга кўра, агар Киев режани қабул қилишдан бош тортса, Вашингтон ҳарбий ёрдамни чеклаш ёки қисқартириш эҳтимоли ҳақида ҳам ойдин ишора берган.
Зеленский бу борада мамлакатга мурожаат қилиб, Украина айни вақтда жуда мураккаб босқич остонасида турганини таъкидлади. Президентнинг сўзларига кўра, Киев шаън ва суверенитетни йўқотмасдан тинчликка эришиш учун барча вариантларни муҳокама қилиб чиқади. У АҚШ ва Европадаги иттифоқчилар билан ўртадаги 28 банддан иборат режа бўйича таклифлар алмашиниш давом этаётганини билдирди.
Украина етакчиси шу куни АҚШ вице-президенти Жей Ди Вэнс ҳамда Пентагон вакиллари билан деярли бир соатлик суҳбат ўтказиб, режанинг бир неча муҳим бандлари устида аниқ мулоҳазалар алмашганини таъкидлади. Унинг таъкидлашича, тинчлик йўлининг самарали бўлиши учун Киев ўз позициясини қатъий равшан белгилаб бормоқда.
Москва эса Оқ уй режаси матнини қабул қилганини тасдиқлаган бўлса-да, унда келтирилган бандлар Россия билан мазмунан муҳокама қилинмаганини билдирди. Кремл вакили Дмитрий Песковнинг айтишича, уларга ҳали расман ҳужжат тақдим этилмаган.
ОАВларда тарқалган режа бўлакларига кўра, АҚШ Украинадан муайян ҳудудий ён беришлар, армия сонини қисқартириш ва НАТОга аъзо бўлмасликка оид кафолатлар талаб қилмоқда. Евроиттифоқнинг етакчи давлатлари бу таклифга эҳтиёткорона муносабат билдириб, Украина суверенитети ҳамда мудофаа қобилияти чекланмаслиги шартлигини таъкидламоқда.
Киев эса бир нарсани аниқ айтган: ҳудудий яхлитлик савдога қўйилмайди. Улар тинчлик ҳақида гапиришга тайёр, аммо мамлакатнинг чегаралари, қоғоздаги чекловлар ва армия салоҳиятини пасайтириш каби масалалар бўйича кескин позицияни сақлаб қолмоқда.
Аниқки, яқин кунлар минтақа учун жуда муҳим бўлади. АҚШ босими ортиб, Россия ва Европа томонларида ҳам фаол мулоқот кетар экан, Украина олдидаги танлов ҳам ижтимоий, ҳам геосиёсий жиҳатдан энг оғир синовлардан бирига айланиб бормоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
