АҚШ президенти Доналд Трамп Украинага оид сўнгги таклиф ҳақида журналистлар йўллаган саволга кескин ва қисқа жавоб қайтарди. Ундан: «Бу Киев учун охирги таклифингизми?» деб сўрашганда, Трамп бунга катта ишонч билан «йўқ» деди. Унинг айтишича, у фақат «анча аввал ҳал қилиниши керак бўлган» тинчликни таъминлаш ниятида.
Президент таъкидлашича, агар ўзи аввалроқ Оқ уйда бўлганида, ҳозирги можаро умуман келиб чиқмас эди. У ахборот воситаларига: «Биз бу урушни барибир тўхтатишга ҳаракат қиляпмиз», дея билдириш орқали ўзини тинчликка эришишга интилаётган етакчи сифатида кўрсатди.
Трамп бундан бир кун олдин Fox Radio’даги интервьюсида 27 ноябрни — «Шукроналик куни» арафасини Украина таклифни қабул қилиши мумкин бўлган «қулай муддат» деб атади. Унга кўра, агар жараён яхши бораётган бўлса, вақтни узайтириш имкони ҳам бор.
Трампнинг фикрича, Украина президенти Владимир Зеленскийнинг қўлида «керакли карталар» қолмаган, шунинг учун у АҚШ таклифини маъқуллашига тўғри келади. Зеленский эса жавобан Киев «жуда оғир танлов» олдида турганини таъкидлади. Унинг айтишича, қарор икки вариантдан бирини танлашга келиб тақалади: «28 банддан иборат таклиф» ёки «қадр-қимматни йўқотиш ҳамда асосий ҳамкордан айрилиш хавфи».
Россия президенти Владимир Путин ҳам Америка томони ишлаб чиққан тинчлик режасига муносабат билдириб, унинг айрим нуқталари мумкин бўлган келишув учун асос бўлиши мумкинлигини тан олди. Бироқ у матн Москва билан муҳокама қилинмаганини айтди ва бунга сабаб сифатида «АҚШ Украина розилигини ололмаяпти, чунки Киев унга қарши» эканини таъкидлади.
Ҳозирча АҚШнинг 28 банддан иборат режаси борасидаги аниқ ўзгартишлар ошкор қилинмаган. Бироқ маълумки, Европа мамлакатлари бу лойиҳанинг бир қатор бандларини қайта кўриб чиқишни талаб қилмоқда. Бу эса тинчлик музокаралари яна анча узоқ давом этишини англатади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
