Россия президенти Владимир Путин Қирғизистон пойтахти Бишкекда журналистлар билан суҳбатлашар экан, сўнгги кунларда оммавий ахборот воситаларида тарқалган «Сергей Лавров президент ғазабига учради» деган даъволарни мутлақо инкор этди. Президентнинг таъкидлашича, бундай хабарлар асоссиз ва ҳеч қандай ҳақиқатга ёпишмайди.
Путин миш-мишларга изоҳ берар экан, уларни кескин танқид қилди ва «бемаънилик» деб атади. Давлат раҳбарининг сўзларига кўра, Россия ташқи ишлар вазири ўзининг аниқ иш режаси асосида ҳаракат қилмоқда ва ўзига юклатилган вазифалар билан шуғулланишда давом этмоқда.
«У ҳеч қандай ғазабга дучор бўлмади. Унинг ўз иш жадвали бор. Менга қайси вақтда нима билан банд бўлишини айтди. У ҳозир Америкалик шериклар билан учрашув учун тайёргарлик кўрмоқда», — деди Путин.
2025 йил ноябр ойида айрим ОАВ ва ижтимоий тармоқларда Лавров «Путиннинг қаттиқ танбеҳини олди» деган хабарлар тарқалган, ҳатто баъзи кузатувчилар буни Россия ТИВнинг бўлажак «тинчлик музокаралари» учун янги форматга ўтиши билан боғлашган. Аммо президентнинг бевосита баёнотидан сўнг бу миш-мишлар ҳақиқатдан узоқ экани аниқ бўлди.
Сиёсий таҳлилчилар фикрича, бундай ёлғон хабарлар кўпинча глобал кун тартибидаги жиддий мавзу — тинчлик музокаралари ҳақидаги қизиқиш юқори бўлган пайтларда кенг тарқалади. Аммо расмий позиция маълум: Лавров ўз вазифасида, режа асосида ишламоқда ва Вашингтон билан навбатдаги дипломатик мулоқотга тайёргарлик кўрмоқда.
Бу баёнот Россия ташқи сиёсатининг барқарорлигига ва ички қарор қабул қилиш жараёнларида «муаммо бор» деган қарашларнинг асоссизлигига яна бир бор ойдинлик киритди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
