Россиядаги нуфузли «Адолатли Россия — Ҳақиқат учун» партияси раҳбари Сергей Миронов мамлакатдаги миграция ҳолати кескин ва қатъий чоралар кўришни талаб қилаётганини таъкидлади. «Россия 24» телеканали эфирида сўзлаган сиёсатчи, партиянинг мигрантларга қарши учта фундаментал таклифини илгари сурди, улар орасида Марказий Осиё давлатлари билан виза режимини ўрнатиш ҳам бор.
Сиёсатчининг кескин асослари
Мироновнинг сўзларига кўра, айрим жойларда Россия фуқаролари ўз жойларидан кетишга мажбур бўлмоқда, чунки бу ҳудудларни «келгиндилар босиб олган ва ўз урф-одатларига кўра яшаётган». У очиқчасига «улар Россия қонунларига умуман тупуриб қўйган» дея, вазиятнинг кескинлигини оширди. Унинг таъкидлашича, ҳолат бир неча қатъий чоралар кўрилишини талаб қилади.
Қариндошларни жамоавий жазолаш таклифи
Биринчи таклиф — патент тизимидан вахта (ротация) усулига ўтиш. Ишчилар аҳоли пунктларида эмас, балки объект қурилаётган ернинг ўзида яшаш жойлари билан таъминланиши керак. Тамойил: «Келди – ишлади - пул топди – кетди».
Иккинчи таклиф — агар мигрант жиноят қилса, уни қонун бўйича жазолаш, аммо бутун оила аъзоларини ва қариндошларини зудлик билан Россиядан депортация қилиш. Бу, аслида, жамоавий жазолаш механизмининг жорий этилишини англатади.
Учинчидан, Марказий Осиё давлатлари билан виза режимини ўрнатиш. Сиёсатчи бунга эртами-кечми эришилишига ишонч билдирди.
Миронов аввал ҳам бундай кескин чоралар ҳақида гапирган. Унинг таъкидлашича, ҳозирги миқёсдаги мигрантлар оқимининг фақат кичик бир қисми ишчи бўлиб, қолганлари «шахсий, оилавий сабабларга кўра» келади ва бу ижтимоий соҳага ортиқча юк бўлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
