Украина сиёсий саҳнаси яна халқаро эътибор марказига айланди. Сабаб — АҚШнинг собиқ миллий хавфсизлик маслаҳатчиси Майкл Флинн ҳамда Россия президенти матбуот котиби Дмитрий Песковнинг бир вақтнинг ўзида турлича, аммо кескин баёнотлар бериши.
Флинн ўзининг Х ижтимоий тармоғидаги саҳифасида Украина раҳбариятига нисбатан қаттиқ танқид билан чиқиб, президент Владимир Зеленскийни «омадсиз етакчи» сифатида атади ва уни ҳамда унинг атрофидаги турли шахсларни ҳибсга олишни талаб қилди.
Унинг фикрича, Киевдаги вазият узоқдан туриб бошқариб бўлмайдиган даражада кескинлашган ва Вашингтон энди урушни тўхтатишга қаратилган аниқ йўлларни излашга мажбур.
Флинн бу билан чегараланиб қолмади:
«Америка тинчликка эришиши шарт. Агар керак бўлса куч билан, лекин тинчлик бўлиши керак. Украинага ажратилган миллиардлаб долларлар коррупциялашган глобалистларнинг манфаатидаги маъносиз урушга сарфланмоқда», — дея танқид қилади у.
Шу орада Москва ҳам ўз муносабатини билдирди. Дмитрий Песков Украина президенти девони раҳбари Андрей Ермакнинг лавозимидан кетиши ва Киевдаги кадрлар ўзгариши фонида «жиддий сиёсий инқироз юзага келаётганини» таъкидлади.
Унинг фикрича, Украина ҳукуматининг узоқ вақтдан буён танқид қилинаётган коррупция амалиётлари АҚШ ва Европадан келаётган молиявий қўллаб-қувватлашнинг қисқаришига олиб келиши мумкин.
Песков шуни ҳам қўшимча қилдики, бу жараёнлар қандай тугалланиши ҳақида ҳозирги пайтда аниқ прогноз қилиш имконсиз — натижа бир неча йўналиш бўйича кескин фарқ қилиши мумкин.
Хулоса шуки, Вашингтондан келган қаттиқ баёнот ва Москвадаги таҳлиллар Киевдаги сиёсий фаоллик яна юқори босқичга чиққанига ишора қилмоқда. Эътибор марказида эса Зеленский атрофидаги кадрлар ўзгариши ва Ғарб ёрдамининг келажаги турибди.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
