Ғарбий Африка яна сиёсий беқарорлик домида. 7 декабрь куни Бенинда ўзларини «Қайта қуриш бўйича ҳарбий қўмита» деб атаган гуруҳ миллий телевидениедан чиқиш қилиб, президент Патрис Талонни ҳокимиятдан четлатганини эълон қилганди. Улар подполковник Тигри Паскални вақтинча бошқарувчи сифатида кўрсатиб, мамлакатда назоратни қўлга олдик, деб даъво қилганди.
Бироқ воқеалар бутунлай бошқача ривожланди. Маҳаллий 24heuresauBenin нашрининг хабар беришича, тўнтаришга уринишга бош-қош бўлган подполковник Паскал Тигри эгалаб турган ҳокимиятни сақлаб қололмай, қочиб кетган. Манбаларга кўра, исёнчи гуруҳнинг бир қисми ҳам йўқолган, Бенин хавфсизлик хизматлари уларни излаш ишларини олиб бормоқда.
Президент Талоннинг офисидан AFP агентлигига берилган изоҳда вазиятга ойдинлик киритилди. Расмий баёнотга кўра, бу фақат телевидениени эгаллаган кичик бир гуруҳ бўлган, мамлакат армияси бир неча соат ичида назоратни тўлиқ тиклаган ва пойтахт ҳам, вилоятлар ҳам хавфсиз ҳолатга қайтарилган.
Айни пайтда мамлакатни бошқариб келаётган 67 ёшли Талон келаси йили икки муддатдан кейин лавозимини тарк этиш нияти борлигини билдирганди. Унинг амалдаги ваколат муддати 2026 йил баҳоригача давом этиши керак эди, президентлик сайловлари эса апрелга белгиланган.
Бениндаги бу тўнтариш уриниши қўшни Гвинее-Бисауда президент Умаро Сиссоко Эмбало ағдарилганидан унча вақт ўтмай содир бўлгани минтақа бўйлаб хавотирларни кучайтирди. Охирги йилларда Буркина-Фасо, Мали, Нигер ва Гвинеяда ҳам ҳарбий тўнтаришлар кузатилгани Африка ғарбидаги сиёсий барқарорлик яна жиддий синов остида эканини кўрсатмоқда.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
