АҚШ президенти Доналд Трамп Politico нашрига берилган катта интервюсида Украина–Россия уруши ҳақида тўхталиб, кескин баёнотлари билан яна бир бор эътибор марказига тушди. Унинг фикрлари, айниқса, Зеленский, Байден ва урушнинг умумий оқибатлари ҳақидаги мулоҳазалари жамоатчиликда катта муносабат уйғотди.
Трампга кўра, Украина раҳбарияти вазиятни реал баҳолаши ва воқеликни тан олиши лозим. Унинг таъкидлашича, Зеленский бугунги кунда «ютқазиб бораётган жангда» амалий ечим излаши керак.
«Зеленский воқеликка кўз очиши шарт, чунки Украина майдонда ютқазмоқда. Хариталарга қаранг – улар жуда катта ҳудудларни йўқотишди. Буни ғалаба дея олмаймиз», деди Трамп.
Унинг фикрича, бугун музокаралар учун кучлироқ позиция Россияда. Трамп бунга геосиёсий вазн, ресурслар ва умумий устунликларни асос қилиб кўрсатди.
«Россия ҳар доим йирик давлат бўлиб келган ва бу жиҳатда устунлиги бор. Украина армияси жасоратини қадрлайман, лекин ўзига хос нуқтада куч омили ҳал қилувчи аҳамиятга эга бўлади», деди у.
Трамп урушни ўзининг жавобгарлиги деб ҳисобламаслигини, уни «Байден уруши» деб атайди. Унинг айтишича, урушга энг катта эътирози — ёшларнинг бевақт ҳалок бўлаётгани.
Шу билан бирга, Трамп Зеленскийни «маҳоратли савдогар» деб атаб, унинг Байден администрациясидан улкан маблағ ютиб олишини «Ф.Т.Барнум услубидаги маҳорат» дея таърифлади.
«Зеленский Байденни 350 миллиард доллар ажратишга кўндирди. Аммо натижага қаранг: мамлакатининг 25 фоизи йўқотилди», деди Трамп.
У, шунингдек, Қримнинг йўқотилиши учун Обамани айблади ва Украинада сайловларни ўтказиш вақти келганини таъкидлади.
«Украина демократия ҳақида гапиради, лекин анча вақтдан буён сайлов ўтказмаган. Халқ танлов қилиши шарт. Мен президент бўлганимда бу уруш бошланмаган, ҳатто тўрт йил давом этмаган бўларди», дейди Трамп.
У, ҳатто, агар ўзи президент эмаслигини ҳисобга олсак, бугунги кунда «Учинчи жаҳон уруши» эҳтимоли юқори бўлиши мумкинлигини таъкидлади.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
