Таиланд ва Камбоджа ўртасида бир ҳафтадан кўпроқ вақт аввал бошланган жанговар тўқнашувлар 14 декабрь, якшанба куни ҳам тинчимади. АҚШ президенти Доналд Трампнинг ўт очишни тўхтатиш ҳақидаги баёнотларига қарамай, томонлар бир-бирини ҳудудларни ўққа тутишда айблашни давом эттирмоқда.
Ўзаро айбловлар ва ҳужумлар
Таиланд Мудофаа вазирлиги матбуот котибининг хабар беришича, Камбоджа қиролликнинг бир қатор чегарадош вилоятларини ўққа тутган ва бомбардимон қилган. Ўз навбатида, Камбоджа Мудофаа вазирлиги ҳам ярим тундан кейин Таиланд ушбу давлат ҳудудини миномёт снарядлари ва бомбалар билан ўққа тутганини маълум қилган.
Жанговар ҳаракатлар кучайгани сабабли, Камбоджа билан чегарадош Таиланднинг қатор вилоятларида кечки соат 19:00 дан эрталабки 05:00 гача комендантлик соати жорий этилди. Бундан бир кун аввал Камбоджа Таиланд билан чегарадан ўтиш пунктларини ёпган эди.
Трампнинг муваффақиятсиз воситачилиги
12 декабрь куни АҚШ президенти Доналд Трамп Таиланд ва Камбоджа бош вазирлари — Анутхин Чанвиракун ва Хун Манет билан телефон орқали музокара ўтказган. Шундан сўнг у ҳар икки мамлакат ўша куннинг ўзи — 12 декабрдан бошлаб барча жанг ҳаракатларини тўхтатишга келишиб олганини эълон қилган.
Бироқ, суҳбат якунлари бўйича берилган расмий баёнотларда на Анутхин, на Хун бундай келишув ҳақида тилга олмаган.
Таиланд бош вазири эса оташкесим бўйича келишув мавжудлигини очиқ рад этган.
Анутхин Чанвиракун (Facebook): “Таиланд мамлакатимиз ва аҳолимиз учун таҳдид ва хавф йўқолганини ҳис қилмагунча, ҳарбий ҳаракатларни давом эттиради”.
Камбоджа ҳукумати раҳбари Хун Манет ҳам Трамп билан суҳбатни эслаб, мамлакати октябрь ойида Куала-Лумпурда имзоланган келишув асосида тинч ечим излашда давом этаётганини билдирган.
Қурбонлар ва тарих
Ўнлаб йиллардан бери давом этиб келаётган чегара бўйича баҳс билан боғлиқ бу қарама-қаршиликнинг навбатдаги кучайиши 8 декабрь, душанба куни бошланган эди. Жангларда томонлар ракета ва артиллериядан фойдаланмоқда.
Расмий маълумотларга кўра, 14 декабрь ҳолатига келиб ҳар икки томондан камида 25 киши ҳалок бўлган. Улар орасида 14 нафар таиландлик ҳарбий ва 11 нафар камбоджалик тинч аҳоли вакили бор.
Эслатиб ўтамиз, июль ойидаги аввалги кескинлашувдан сўнг (ўшанда 5 кунлик жангда 40 дан ортиқ киши ҳалок бўлган) АҚШ воситачилигида оташкесимга эришилган. Бироқ, Таиланд ноябрда чегарада мина портлаши оқибатида икки аскари ҳалок бўлганини рўкач қилиб, Камбоджани келишувни бузишда айблаган ва ҳаракатлардан чекинган.
“Zamin”ни Telegram'да ўқинг!
Меҳмон гуруҳидаги фойдаланувчилар ушбу мақолага изоҳ қолдира олмайди.
