Сиднейнинг Бонди-Бич ҳудудида байрам тадбири вақтида содир бўлган қуролли ҳужум бутун мамлакатни ларзага солди. Полиция маълумотига кўра, ота ва ўғил томонидан уюштирилган ҳужум оқибатида 15 нафар одам ҳалок бўлган, ҳужумчилардан бири воқеа жойида ўлдирилган. Шу билан қурбонлар сони 16 нафарга етди. Ҳалок бўлганлар орасида болалар ҳам бор.
Австралия Бош вазири Энтони Албанизи бу воқеани жуда оғир фожиа деб атади ва ҳукумат қуролга оид қонунларни янада қатъийлаштиришга қарор қилганини билдирди. Режаларга қурол лицензияларининг амал қилиш муддатини чеклаш ва бир кишига рухсат этиладиган қуроллар сонини камайтириш киради. Ҳукумат бу чоралар одамлар хавфсизлигини оширишга қаратилганини таъкидлади.
Полиция гумонланувчилардан бири бир неча йилдан бери қонуний қурол лицензиясига эга бўлганини маълум қилди. Шу сабабли мавжуд тартиблар етарлими, деган саволлар пайдо бўлди. Ҳозирда ҳужум сабаблари ва воқеа тафсилотлари тўлиқ ўрганилмоқда.
Ҳужумдан сўнг Бонди-Бичда қурбонлар хотирасига гуллар қўйилди, ҳудудда хавфсизлик кучайтирилди. Ҳукумат ва жамоатчилик бу каби зўравонликка йўл қўймаслик зарурлигини таъкидлаб, жабрланган оилаларга ҳамдардлик билдирди.
Меҳмон гуруҳидаги фойдаланувчилар ушбу мақолага изоҳ қолдира олмайди.
